สู่ขวัญแต่งงานสมัยใหม่ | บพ.เอกราช บุญอาจ | ศิษย์สำนักพราหมณ์เชตะวัน

สู่ขวัญแต่งงานสมัยใหม่ ศรี ศรี มื้อนี้แม่นมื้อดี มื้อเศรษฐีอะมุตโชค โตกนี้แม่นโตกไม้จันทน์ ขันใบนี้แม่นขันวิเศษ ผู้เหนือเกศป่อนลงมา เทวดาเอามาสู่ เอามาอยู่ในเคหา สองสามีภรรยาจักได้เกิด พระอินทร์เปิดส่องพระแจ พระพรหมแลเผยพระโอษฐ์ ว่ามื้อนี้หายโทษทั้งมวล บรบวนทุกอย่างผู้เป็นช่างแต่งพาขวัญ มีทั้งมวลหมากเมี่ยง พาขวัญเที่ยงใบศรี งามแสนดีเจ็ดชั้น แถนพ่อปั้นแต่งมานำ มีเงินคำพันไถ่ เอามาใส่พาขวัญ บรบวนถ้วนถี่ งามเอานี่จั่งเมืองแมน ฝ้ายผูกแขนห้อยระย้า มาจากฟ้าเมืองพรหม มาเชยชมสององค์อ่อน เข้าบ่อนนอนหนุนหมอน สองเนาว์นอนแขนก่าย ทั้งสองฝ่ายตกลง สองอนงค์ลูกของแม่ มาแหนแห่เฮือนหอ โคตรวงศ์ยอขันโตก ถืกโฉลกเหลือตา ยอลงมาตั้งใส่ ขันโตกใหญ่ทองคำ เพชรมานำพลอยต่อ เงินมาต่อประดับนำ เงินและคำเต็มถาด หลายแสนบาทสินดอง เอามาฮองตกแต่ง บ่ได้แบ่งปันไผ สองหัวใจจั่งได้มาอยู่ฮ่วม ได้มาร่วมเป็นหนึ่งแผ่นทอง คนทั้งสองสมเผ่า เป็นคู่เก่านำมา สองขวัญตาจั่งได้มาพบพ้อ จั่งให้พ่อมาขอ จั่งได้ยอขันหมาก ไขคำปากว่าตกลง สมประสงค์ทั้งสองฝ่าย เอาแขนก่ายเมียแพง จึงได้แสดงในมื้อนี้ บายศรีเจ้าให้ฮิ่นตรอง..... ตามครรลองคองเค้า ผู้เฒ่าว่าวันวิวาห์เป็นมหามงคลคู่เคียงของเจ้า ก่อนสิเอาชมซ้อน นอนเฮียงคู่ สิได้อยู่สืบสร้างวิมานกว้างข่วงนคร แสนสะออนสาแหล่ว แนวเจ้าสาวงามค่อง ทองเต็มคอแหวนใส่ก้อย งามละห้อยต่างหู งามพธูสมแล้ว แววตาคมเคี่ยม ดูเสงี่ยมเรียบร้อย คนพลอยชื่น ชื่นชม ดูเหมาะสมสาแหล่ว....(นางสาว..ณิชกุล ...)คนดี งามโสภีเอาคักแม่นสมเจ้าสาวแท้ บ่ได้แปรผันปี้น พี้นลินมักง่าย จนฝ่ายชายเชื่อมั่น วันนี้ได้รับรอง ได้จับจองหัวใจเจ้า เนาว์นอนในบ่อน เจ้าบ่าว.(......ชื่อเจ้าบ่าว..เอกนริศย์)...แสนออนซอน เป็นผู้นำช้างเท้าหน้า สิพาก้าวแม่นบ่ถอย คอยมาถึงจนมื้อนี้ มีพิธีงานแต่ง ได้จัดแจงทุกด้าน ประสานให้แม่นใส่กัน มาจนถึงมื้อนี้นั้น วันที่....(.........) เป็นมหามงคล แม่นดีเหลือล้น ญาติทุกคนมาแล้ว เสียงแซว ๆ เตรียมฮ้องโห่ โอ่เอาขวัญหมู่เจ้า ให้มาเข้าแม่นสู่คีง เจ้าอย่ามิดอิ้งติ้ง ยามขวัญมาให้เจ้าตื่น ให้เจ้าซื่นพ้อว้อ อย่ารอช้าอยู่นาน...ว่ามาเยอขวัญเอย.... ขวัญเจ้าไปอยู่ก้ำหนแห่งทางใด๋ ขวัญเจ้าไปศึกษาเล่าเรียนอยู่ไสนอ ได้ไปเรียน ม.ต้น ม.ปลายอยู่ไสแหน่ เจ้าอย่ายืนแท้แล้ ให้มาแม้อย่าอยู่นาน อย่าสำราญมัวเล่นกลางไพรในป่า ให้เจ้ากลับมาสา มาหาพ่อแม่เจ้า มากินข้าวอยู่เฮือน ว่า..มาเยอขวัญเอย.... ขวัญเจ้าไปอยู่ห้องหอพักทางใด๋ หรือเจ้าไปมหาวิทยาลัย บ่มาทางพี้ หรือเจ้าไปอยู่ลี้ในที่ทำงาน หรือเจ้าไปโรงพยาบาล แต่คราวปีนี้นั้น ให้พะลันมาแม้ ถึงเวลาให้เจ้าต่าว มันถึงคราวมื้อนี้ ให้มาพี้ อย่าอยู่นาน... ขวัญเจ้าไปอยู่หม่องแรกพบทั้งสอง ให้ซ่อยกันประคอง ล่องมาทางพี้ ขวัญไปกินสุกี๊ เคเอฟซีในห้างใหญ่ กินไอศรีมอยู่พุ้น ข้าวปุ้นก้อยอยู่หว่างใด๋ ขวัญเจ้าไปพักร้อน พักผ่อนทางไกล หรือเจ้าลงไปไทย เที่ยวเพลินทางพุ้น บุญเจ้าไปทางก้ำ ทางลาวหรือพม่า มาเลเซียฝ่ายใต้ เขมรนั้นให้ดั่นมา หรือเจ้าไปทางพุ้น ทำบุญทางวัด สารพัดท่องเที่ยว เทียวเล่นแม่นบ่มา ขี่เรือบินเหิรฟ้า ให้กลับมารีบด่วน เชิญเอาขวัญอ่อนหล่า สองเจ้าให้ด่วนมา ว่ามาเยอขวัญเอย..... หรือเจ้าไปเว็ดดิ้ง โพสท่าทางใด๋ ยังบ่ทันหนำใจ อยู่บ้อน้อท้าว พาเจ้าสาวมาเด้อ มาเด้อรีบด่วน เจ้าอย่าม่วนอยู่ฮั่น วันนี้ให้ด่วนมา...ขวัญแข่งให้เจ้ามาอยู่แข่งลีลา ขวัญขาให้เจ้ามาอยู่ขาลีล่าย ขวัญแขนขวา แขนซ้ายก็ให้มาตุ้มมาโฮม ทั้งขวัญนม และขวัญคาง ขวัญเอวบางท้องกิ่ว ทั้งขวัญคิ้วและขวัญตา ขวัญกายางามดี ก็ให้มาสามื้อนี้วันนี้ ว่ามาเยอขวัญเอย..... เออ.ครันแม่นขวัญมาแล้ว ฟังคำพราหมณ์สิสอนสั่ง ยังพิธีมื้อนี้ วิวาห์แล้วให้จื่อเอา...... ผู้เป็นผัวอย่าแข็งคำเว้า เห็นพ่อเฒ่าแม่เฒ่าให้ยำเกรง ผู้เป็นเขยอย่าเส็งเสียงปาก อย่าไปถากคำจา คันไปไฮ่กะให้มา คันไปนากะให้ต่าว ฟั่นเชือกคร่าวงัวควาย อย่าตื่นสายลุกยาก อย่าได้ปากเกินตัว ผู้เป็นผัวให้ฮักเมียจนแก่ ให้คือแม่ของโต อย่าพาโลเลาะบ้าน อย่าขี้คร้านนอนเว็น อย่าไปเห็นสาวแก่ อย่าไปแก่กว่าวงศ์ อย่าไปโกงใส่โคตร อย่าเว้าโพดคันเห็น เฮ็ดบ่เป็นให้ถามไถ่ อย่าไปใหญ่กว่าลุง อย่าไปสูงกว่าป้า อย่าไปด่าวงศ์วาน อย่าไปพาลพี่น้อง อย่าไปฟ้องซุมแซง ...ผู้เป็นเมียกะอย่าแข็งคำเว้า ตื่นแต่เช้าก่อนผัวโต อย่าเสียงโวสุยเสียด อย่าไปเคียดไววา คันไปไฮ่กะให้รีบมา คันไปนากะให้รีบต่าว เห็นผู้บ่าว อย่าแซนแลน ๆ ยินเสียงแคนอย่าไปฟ้อน อย่าไปย้อนใส่เสียงกลอง อย่าจองหองใส่ปู่ย่า อย่าไปด่าอาวอา คันไปมาให้คมเขี่ยม อย่าไปเสี่ยมซุมแซง อย่าไปแฮงฟืดฟาด อย่าประมาทปู่ย่าโต อย่าไปโสความเก่า อย่าไปเล่าความเดิม อย่าไปเสริมผู้อื่น อย่าไปตื่นเสียงคน อย่าไปวนของเพิ่น คันเพิ่นเอิ้นจั่งขาน คันเพิ่นวานจั่งซ่อย ให้ไปค่อยมาค่อย เห็นโคตรเห็นวงศ์ อย่าไปโกงเถียงพ่อเถียงแม่ เห็นคนแก่ให้ปากเว้าจาไข อย่าจัญไรป้อยผี ป้อยห่า อย่าไปด่าพี่น้องทางผัว อย่าเมามัว นำไลน์นำเฟสต์ ให้เจ้าเฮ็ดพาแลงพางาย อย่าระบายอารมณ์ป้อยแซ่ง ให้ฮักแพงกันไว้ ถนอมใจกันทั้งคู่ ให้ได้อยู่สืบสร้างกุศลแท้มนุษย์คน.....ผลไปถึงลูกเต้าให้มาเกิดนำกัน ให้มีบุญสัมพันธ์ปรารถนาสมแม้น แขนยอมือสองเจ้าอธิษฐานเอาเด้ออุ่น บุญของเจ้าแล้วบัดนี้ ขวัญศรีหล่า ให้ต่าวมา..ว่ามาเยอขวัญเอย...... เออ..ครั้นแม่นขวัญมาแล้ว พราหมณ์สิเหล่าแถมพร ตัดเอาตอนคาถาแม่นดีเหลือล้น ขอทุกคนทุกท่านรับเอารีบด่วน ประมวลพรส่งให้ผองเจ้าให้รับเอาเด้อ....อเนกเตโช ไชยะตุภะวัง ไชยะมังคะลัง สุขัง พะลัง อาวาหะ วิวาโห สุมังคะโล โหตุ..... Youtube - https://www.youtube.com/channel/UC1qLC7ktduVNPNJkKJegr2Q Facebook - https://bit.ly/3dfgGAg