قصيدة مني اليكي | الشاعرة اميرة البيلي
الكلمات :
" مني إليكي "
- فـ المُفتتح : خليني أقولك شئ مهم
أنا مش بلومك ولا نصي غرضه عتاب او فتح باب اتقفل
محصلش بينا كلام علشان اقولهولِك
فـ سردتلِك النص دة دلوقت
مني إليكي!!
وبكل ذرة كره بكتبلِك الآتي
اللي انتي حاضنه فـ ايده دلوقتي
من شهر كان بيقولي يا حياتي .
لهفة البدايات غَمت عينيا بحُب
والدور ياست الحُسن جه عليكي
مني إليكي!!
هيقول لـ عينِك شِعر فـ قصايد
هيقول فـ ضحكِك م الغزل أبيات
هيلقبِك " آيه " ملهاش بديل لو كل يوم زادوا الآيات
هيبص لِك بعيون بريئة حزينة م الدنيا
وهيقنعك فـ أقل من ثانية بنظرة عيونه
إن الجميع وحشين!!
تركوه فـ طريقه عشان ضعيف غلبان
تركون عشان إنسان بيحب من قلبه
وهيبكي قدامك..
فـ هتحضنيه بشفقة وبقلب أم انفطر
لما رأت الدمع فـ عيون الضنا شلال
هتكوني صالحة ، اصيلة ، بنت حلال
فـ هتمسكي ايده وتطمنيه بهدوء
هيحط ورده بكل رقه وزوق
وبعد فترة هتلقي كل الورد اتحول
من ورد أحمر لـ دم قلبك لما داق الشوك
في حكمة أمي قالتها من فترة
اسأل مجرب يابني ولا تسأل طبيب
والي اتلدع من الحب يفهم
الحضن لو كان م العدو
والحضن لو كان م الحبيب
وحبيبك العاشق أصبح عدو ليا
حضنه الي كان سكاكين بتقتلني
يا هيقتلِك .. يا هتقتله " هي "
هذا الضمير عائد علي بنت بعديكي
منك إليها .. ومني أنا ليكي
هيبص فـ عينيكي وبلمعه كدابة!
ويحلفك بالحب ما تسيبي!
هيلبسك خاتم مع سلسلة فضة
هيطيرك سابع سما!!
ويوقعك!!
مفزوعة م الخضة ..
فـ طبيعي هتبصيلي باستنكار!
وتسأليني اخدتي حقِك كيف ؟
خليني اسأل انا واجابتي فـ سؤالي
الكلب لو يوم عضنا .. هنردله العضة ؟
وأنا خدت مصل مضاد واديني اهو خفيت!
رغم أنه كان بيقولي استكفيت!!
وزهدت كل الناس قصاد عينك
واديه فـ حضنك بيطمنك بكلام
هيقولك انتي علاجي م الإدمان
ادمنت ناس وسابوني فـ الرحلة
هتكوني ليه نحلة قرصتها هتداوي
وتموتي بعد ما يكتفي منك
وهتبقي زي الباقي والله!
بنت فـ اوضتها بتبكي من القهرة
هتكوني ليه سهرة! وهيتركك وينام
بعد اما تخلص لهفة البدايات
هيسيب إيديكي بكل زوق وسكات
ويطلع العيب الي فيه فيكي!
مني إليكي !
يالي انتي حاضنه ايديه هتتخاني
وبقولها ليكي بكل ذرة كره من تاني
والله هيسيبك وهيكسرك بغياب!
كان نص ذنبي عشان وجعت " دياب "
والباقي ذنبك لما صدقتيه
بشفق عليكي إكمني شفت كابوس
وأنتي بغبائك روحتي حققتيه
إسكندرية بكل نواحييها
تشهد ع الي كان ما بينا زمان
مش كل شخص " سكندري " حيوان!
يكسر فـ قلب صبايا اطمنوا لعينيه
تشهد عليا لمستي لإيديه وقت
اما زادت رعشتي وبخوف!
كان رده آسف بُعدي كان لظروف
وظروفه كانت اللقا بينكم
من فترة كنت معيطة و ماشيه
وايديا خبطت فيكي مش قاصده
وانا قولت اسفه وبعدها عديت ..
علشان دموعي ماتنكشفش لحد
المرة دي كان كل شيء انتهي ..
وقفلنا باب اللقا بـ القفل والمفتاح
كان هو برده مجهز الجوابات
وحاجات كتيره ف ايده علشانك
قالك باني كنت داء جواه ..
وعلاجه كله هيبقي من طبك
قالي خلاص مبحبكيش علشان
كان قال ساعتها بانه بيحبك
نزل صورتكوا وشوفتها اتخضيت
وعرفت انك كنتي نفس البنت ..
بصيت بفرحه وبعد لحظة حزنت
وبقول ف سري الدنيا دواره ..
لو كنت مثلا وإحنا ف الشارع
ممشيتش بعد الخبطة ف ايديكي
لو كنتي حتي توقعي المناديل
واستني لحظة واجيبها من ع الارض
كات عيني جات ف عينيكي ولاحظتي
بإن عيني من البكا بتموت ..
وساعتها كنتي هتسألي مالك
ف هقول ساعتها القصه بالتفصيل
وهتبكي برده واسلفك مناديل
وساعتها ممكن كنتي هتحسي
ان اللي جايلك مش جميل خالص
وان الوشوش ف الدنيا خداعه
وهتبقي عارفه تردي وتقولي
ان انتي شوفتي حقيقته من ساعه
لكن اكيد
فيه حد قبله كان معاكي اتجرح
كان زيه زيي وشاف صواركوا اتخض
الدنيا دايرة بنمشي اولها ..
وديونا لازم كلها تترد
هيعدي وقت وتمشي بتعيطي
وهتبقي رايحه للفراق والخوف
فيه بنت تانيه تعدي من جنبك
وهتخبطيها بغصب وتقفي تتأسفي
وساعتها لازم تحكي وتقولي
علي كل جرح وكسر ف عينيكي
وادي القصيدة وقصيتي وياه
والرحله مني والوصول ليكي
عود : مصطفي مسعد
كمانجا : مصطفي بشبيشي
كيبورد : أمير أمين
قانون : يحيي رمضان
ناي : مودي الشافعي
بركشن : عبد الرحمن حديدة ، مصطفي نبيل
Business Management: Ahmed Elmasry
-
تابعونا على:
Youtube Channel:
http://bit.ly/2OUmsKD
تويتر :
http://bit.ly/32Ccoul
فيسبوك:
http://bit.ly/2KcJaMe
تيك توك :
https://vm.tiktok.com/ZMe8gQXbm/
انستجرام :
https://instagram.com/amira_el_bialy
للتواصل مع مكتب إدارة الأعمال
01096101665
01271130330
#اميره_البيلي
#amiraelbialy
#مني_إليكي