ආයුර්වේද වෛද්‍ය ක්‍රමයේ එන ‘වාත රක්ත’ රෝගය අද බොහෝ අයට තිබෙන රෝගයක් වෙලා. නමුත් වේදනාවෙන් යුක්තව හිටියාට රෝගයේ සැබෑ තත්ත්වය ගැන ඔබට වැටහීමක් නැති බව පෙනෙනවා. මෙය ‘රක්ත වාතය’ වශයෙනුත් හැඳින්වෙනවා. රක්ත වාතය කෝප වීමෙන් මේ කියන රෝග තත්ත්වය ඇති වෙන්නෙ කොහොමද කියන එක වැදගත්.
ශරීරය තුළ හට ගන්නා විවිධ හේතු නිසාවෙන් ලේ ධාතුව කිපෙන්නට පුළුවනි. ‘රක්තය දූෂණය වෙලා’ කියලා ආයුර්වේද වෛද්‍යවරු හමුවට ගියාම කියන්නේ ඒකයි. රුධිර නාළ තුළ පිරී තිබෙන ලේ දූෂණය වීමෙන් ඇතිවන මේ තත්ත්වය නිසාම කුෂ්ඨ රෝගී තත්ත්වයත් ඇති වෙනවා.
watha rakthaya
විශේෂයෙන් තෙල් සහිත ආහාර පාන ගැනීම, ඇඹුල් සහිත ආහාර ගැනීම, කට දැවිල්ල අධික ආහාර නිතර ගැනීම, විශේෂයෙන් අඹ, අච්චාරු, බල මාළු, ඉස්සෝ, කකුළුවෝ, දැල්ලෝ වගේම තක්කාලිත් කෑමට නිතර ගැනීම හොඳ නෑ.
පිළුණු වූ ආහාර, දිරවීමට අපහසු ආහාර ගැනීම, කොල්ලු හා උඳු වගේ දේ නිතර ගැනීම, රස කැවිලි, හකුරු, උක්පැණි, මී කිරි, මෝරු වගේ දේවල් වැඩිපුර කෑම බීම, දහවල් කාලයේ වැඩිපුරම නිදා ගැනීමට හුරුවීමත්, කෑම කෑ ගමන් නිදා ගැනීමත්, නිතර කේ‍රා්ධ සිතිවිලිවලින් පෙළීමත් වාත රක්තය ඇවිස්සීමට බලපානවා.
ඔබේ ශරීරයට අධික විඩාබර ගතියක් දැනෙනවා නම්, ආහාර දිරවීම පමා වෙනවා නම්, මල මුත්‍ර පිටවීමට අපහසුතා ඇති වෙනවා නම්, ඒවා හොඳින් පිටවී යන්නෙ නැති නම් මේ රෝග තත්ත්වය ඇති වෙනවා. ඒ වගේම මුත්‍රා පිට කළාම එය තද රක්ත පැහැ ගනී නම් ඔබ සැලකිලිමත් විය යුතුයි.
watha rakthaya
උදේ නැඟිටින විට පාදයේ විළුඹ හරියේ වේදනා ගතියත්, කෙණ්ඩා, දණහිස, කලවා, තුනටිය, අත්පා සන්ධිවල යමකින් අනිනවා වගේ වේදනා දේ නම් ඒ මේ රෝග තත්ත්වය නිසයි. එසේම ඇඟපත පණ නැතිවාක් වගේ දැනීමක් ඇතිවෙනවා. මේ රෝග තත්ත්වයන් තියේ නම් ඔබ වෛද්‍යවරයා වෙත ගිය විට කියාවි ඔබට වාත රක්ත රෝගයේ පූර්ව අවධියද තියෙන්නෙ නැතිනම් වාත රක්ත රෝගය පූර්ණ වශයෙන්ම තියෙනවද කියලා.
ආයුර්වේද ක්‍රමයට නම් ලේ පිරිසුදු කිරීම මුලින්ම කරලයි ප්‍රතිකාර අරඹන්නෙ. ඔබට ‘රසකිඳ’ පානය කර එම තත්ත්වය සමනය කර ගත හැකියි. ලේ පිරිසුදු කරගත්තායින් පසු බැබිල, නෙල්ලි, රසකිඳ තම්බා බීමත් ඉතා ගුණයි. ඒ වගේම ඇහැළ පොතු, පාවට්ටා මුල්, රසකිඳ කළං 4 බැගින් ගෙන පත 8 එකට සිඳ කසාය බීමත් ඉතා ගුණයි.
ශරීරයේ සුව තත්ත්වය ලද වහාම නීල්‍යාදි තෛලය හිස ගල්වා හොඳින් සම්බාහනය කළොත් වඩාත් පහසුවක් දැනේවි. කෛශේරු ගුළි හා නිම්බාරිෂ්ටය බීමත් ගුණයි. කෙසේ නමුත් පිළිගත් අයුර්වේද වෛද්‍යවරයකුගේ උපදෙස් මත නිසි පිළිවෙළට මෙය කරන්නේ නම් මැනවි එසේ නැතිනම් රජයේ ආයුර්වේද රෝහලට ගියහොත් ඔබට මේ තත්ත්වයට ප්‍රතිකාර ගැනීම පහසුයි.