Хапар излей келгенме, къалайды деб халыгъыз,
Арагъызда бармыды бийигиз не ханыгъыз а?
Мында джашау бир тюрлюд, джаратмай бир-бирлерин,
Хар ким кёкден тюшгенча, махтаб ала кеслерин.
Бурнун кёкге тутхан а бармыды ичигизде,
Сыйлы, сыйсыз айырыб кюрешемилле сизде?
Дуниядача, сизде да тукъумну сюземилле,
Мункар, Накир къулду деб, умутну юземилле?
Алада бийлик была махтаннган а бармыды,
Дуниядача, анда да ол тёрге чыгъамыды?
Байлыкъ была махтаннган арагъызда бармыды,
Эй, байла, джашау къалайд – эркинмиди, тармыды?
Баймединг, джарлымединг деб, анда сорамылла,
Бай эсенг ёрге ёт деб, анга тёр къоямылла?
Ханды неда бийди деб, сый бармыды алагъа?
Ханы, бийи, къулу да келгенле къабырлагъа.
Тукъумунг къалайды деб, анга киши къараймыд,
Миллетлик а керекмид, анда джукъгъа джараймыд?
Анда уа келин алгъан, къыз берген адет бармыд,
Къызым къулгъа къачды деб, сизде киши джылаймыд?
Ариу адамны анда ариу а кёремилле,
Оноучу уа къалайды, кабинет беремилле?
Мындача уятсызла орунла аламылла,
Онгсузла артда къалыб, ала алчыламылла?
Сизде да дуниядача, къайгъы джюрютемилле,
Дерт тутуб бир-бирине зарлыкъла этемилле?
Бир айтыгъыз билейик, анда джашау къалайды?
Онгсузгъа мында кюн джокъ, мында джашау алайды.
Онгсуз къуру къалады, онглула юлюш алыб,
Сизде онгсуз къалайды, мыдахмыд къуру къалыб?
Эй, байла, махтанчакъла, къалай ёлюб къалгъансыз?
Сыйсызланы къатында хоншу къалай болгъансыз?!
Огъесе сиз барынг да тенг болубму турасыз,
Тюзлюк этилген джерде тюз джашауму къурасыз?
Хар кимни да ишине кёре болурму сыйы?
Адамлыгъы, ийманы дей билсин адам мыйы!
Бизни телеграм каналыбыз: https://t.me/alanladinde
Бизни вконтактиде группабыз: https://vk.com/alanladinde