كمال الأجسام - فورمة الساحل

اللى حضراتكم شايفينه ده لاعب كمال أجسام عالمى اسمه ريتش بيانا.. لو دققت فى صورته هتشوف كتلة عضلية جبارة.. لا تقولى بقى فورمة الساحل ولا فورمة راس البر.. المهم.. الراجل ده وقت ما كان عنده 11 سنة قرر انه يدخل عالم كمال الأجسام.. وده بسبب والدته اللى كانت هى كمان.. مهووسة بعالم كمال الأجسام لدرجة انها كانت بتشارك فى بطولات.. دخل ريتش بيانا أول بطولة ليه وقت ما كان عنده 15 سنة.. لكن للأسف محققش أى إنجاز فى البطولة دى.. حاول تانى وتالت ورابع.. لكن فى كل مرة كان بيفشل.. لحد ما قرر ان الحل الوحيد علشان يبنى كتلة عضلية تساعده فى الفوز بالبطولات اللى بيشارك فيها.. هى الهرمونات والبروتينات وكل الحاجات اللى حضراتكم بتسمعوا عنها بمجرد دخولكم صالات الجيم.. وفعلا بمجرد ما بدأ يشتغل على الهرمونات والبروتينات والحاجات دى فاز بالمركز السابع.. بعدها فاز بمركز أحسن.. بعدها بمركز أحسن وأحسن.. لحد ما فاز بلقب بطل كاليفورنيا.. ودى كانت بطولة بين الولايات الأمريكية.. لكن ورغم انه حقق حلمه إلا إن النجاح ده كان بداية اللعنة.. ليه يا فندم؟.. هقولك.. البروتينات والهرمونات اللى بيتم استخدامها فى صالات الجيم علشان تبنى فورمة الساحل بيكون تأثيرها لحظى.. بمعنى انك طول ما بتستخدمها فانت محافظ على فورمة الساحل.. طيب بطلتها؟.. هترجع تانى زى ما كنت.. وغالبا دى هتكون أحسن حاجه حصلتلك فى حياتك.. لأن فى أحيان كتير استخدامها بدون إشراف طبيب وانك توقفها برده بشكل مفاجئ بدون إشرف طبيب.. بتكون نتيجته آثار سلبية كتير على جسمك.. وهنشرح ده بالتفصيل كمان شوية.. وبالتالى لاعب كمال الأجسام ريتش بيانا علشان ميفقدش الكتلة العضيلة اللى اكتسبها.. استمر فى تعاطى الهرمونات اللى بتبنيله الكتلة العضلية دى.. وكانت النتيجة انه وبشكل مفاجئ.. دخل فى غيبوبة.. وبعد 18 يوم مات بأعراض خطيرة منها تضخم فى عضلة القلب.. صديد فى القصبة الهوائية.. استسقاء.. نزيف فى المخ.. وغيرها من الأعراض اللى هسيبها لحضراتكم فى التقرير الطبى الخاص بوفاته فى المصادر مع الحلقة.. والحالات اللى زى حالة لاعب كمال الأجسام ريتش بيانا كتير جدا جدا.. لدرجة ان فى مقارنة بين معدلات الوفيات الخاصة بلاعبى كمال الأجسام.. ومعدلات الوفيات العادية.. وتحديدا فى الذكور.. اكتشفوا ان فى السن من 30 لـ 34 سنة معدلات وفيات لاعبى كمال الأجسام ضعف معدلات الوفيات العادية.. يعنى لو حضرتك ليك 20 واحد صاحبك.. مات منهم 3 وفاة طبيعية.. فـ 6 منهم بيموتوا بسبب الهرمونات والبروتينات اللى بيتعاطوها فى صالات الجيم.. وفى السن من 35 لـ 39 سنة.. بيموت 9 لاعبين كمال أجسام مقابل 3 بس من الناس اللى ملهاش علاقة بكمال الأجسام.. وفى السن من 50 لـ 54 سنة بيموت 14 واحد بيلعبوا كمال أجسام مقابل 4 من حالات الوفاة العادية.. انت متخيل الأرقام.. دى ولا كورونا.. بس محدش حاسس بها علشان الإعلام مش مركز على ضحاياها.. لكن خد بالك.. المقارنة هنا على الناس اللى بتتعاطى هرمونات خلال ممارسة لعبة كمال الأجسام.. يعنى مش أى حد بيلعب كمال أجسام.. بالبلدى كده الناس اللى بتلعب كمال أجسام بشكل طبيعى.. بدون هرمونات ولا بروتينات والكلام ده.. تمام وزى الفل.. ربنا يديهم الصحة.. وهنا سؤال للشباب اللى بيتعاطوا الهرمونات دى؟.. حضرتك بتاخدها تحت إشراف طبيب؟.. الإجابة طبعا لأ.. طيب عرفنا الإجابة دى منين؟.. من كباتن كمال الأجسام اللى بيتقبض عليهم خلال بيعهم للهرمونات والبروتينات بدون إشراف طبيب.. لدرجة انهم قبضوا على صاحب صالة جيم فى مصر.. وخد بالك من الرقم اللى هقوله ده.. مهرب هرمونات وبروتينات ومكملات غذائية علشان يبيعها فى صالة الجيم بتاعته بقيمة 5 مليون جنيه.. المصادر https://bit.ly/2ZtWiat https://bit.ly/3ElEmhj https://bit.ly/3pHBcQJ https://msdmnls.co/3bvHTgN https://bit.ly/3EiMkYs https://bit.ly/3BjwriK https://bit.ly/3pMdcMr https://bit.ly/3CfUMqR https://bit.ly/3Ep8TuO https://bit.ly/3jHdqkc https://bit.ly/3EBtjAT https://bit.ly/3Big71p https://bit.ly/3jJqR3c https://bit.ly/3EiTuvS https://bit.ly/3Cpjghp https://bit.ly/3Bo4xBY https://bit.ly/3Cn2oYv https://bit.ly/311jUnr #المواطن_سعيد #فورمة_الساحل