ธวัช เมืองเถิน รายก๋านกิ๋นกิ๋นแอ่วแอ่ว และ I-HA.TV มีความตั้งใจ๋ที่จะทำสื่อผ่านโซเซี่ยล เพื่อหื้อคนที่สนใจ๋เสียงซอ บทซอ อยากเรียนรู้ อยากหัดซอ ได้เข้าถึงวิธีก๋านเบื้องต้น ในก๋านเริ่มเฮียนซอ ง่ายๆ ผ่านสื่อสมัยใหม่ เนื้อหาสาระใดขาดตกบกพร่องไปต้องขอสุมา ทำได้เท่าตี้ปัญญาและเวลามี แต่เต๋มร้อยเปอเซนต์ตี้มี คือความปราถนาดีต่อก๋ารคงอยู่ของ ศิลปะ พื้นบ้าน
ขอบคุณครับ ธวัช เมืองเถิน 0812890586
บทซอตั้งเจียงใหม่ (แต่งโดย ธวัช เมืองเถิน)เพื่อประกอบคลิปก๋านสอนซอ
หลอน...
เสียมบ่าคมหื้อใส่ด้ามหนัก หนัก สมองบ่อมีหยัก หื้อเอาแฮงเข้าตุ๊บ
วันนี้จะสอนซอ ผ่านจอ ยูทูบ หัดปั๊บเป๋นปุ๊บ หากว่าเฮาตั้งใจ๋
เจ้าเฮย...
บ่อใจ้ธวัช จะขี้อู้ปุ๋มลม เปรียบเสียมบ่อคม หื้อใส่ด้ามหนัก หนัก
สมองอ่องออ บ่าปอมีฮอยหยัก ต้องขยันนักๆ มันตึงจะได้ดี
หมั่นขีดหมั่นเขียน หมั่นเฮียนหมั่นท่อง หัดจ๋นมันคล่องรับรองบ่ถึงปี๋
กำนั้นจะลู่ผมขึ้นเวที แม่ฮ้างสาวจี๋ จะตวยก้นหลุ้มๆ
เปิดเนตมาปุ๊บ เข้ายูทูบมาเลย ฟังจ๋นมันเกย ท่องจ๋นขึ้นใจ๋ เน่อเจ้า
ยุคสมัยไปตังไดก่อง้ม มีก้าคนก้มผ่อหัวแม่ตี๋น
ก้มจ๋นหูหนวกเอิ้นบ่อได้ยิน พ่องกิ๋นบนดิน แต่ไปขี้บนฟ้า
ยุคข่าวสารรวดเร็วฉับไว ตึงเฟชตึงไลน์ อู้กั๋นหันหน้า
พ่องอวดรูปโป้ อัพเฟสโชว์เสื้อผ้า มีตึงคนบ้า คนดี
อวดสร้อย อวดแหวน อวดแฟน อวดรถ
อวดศักดิ์ อวดยศ อวดกล้วย อวดปี๋
วันนี้จะอวดเรื่องราวดีๆ อวดเสียงซอปี่กับพี่น้องจาวบ้าน
ขอไปฟั่งรำคาญ เน่อผู้ฟังตึงหมู่ นี้แหละน่อ ขอแป๋งใจเย็นๆ
จายญิง...อันนี้ฮ้องว่าซอตั้งเจียงใหม่ ถ้าเอาใจ๋ใส่กำเดวก่อเป๋น
หัดจ๊อยหัดซอ ขอหื้อใจ๋เย็น ๆ มันบ่อใจ้อินเทรนเหมือนเพลงเกาหลีใต้.
หื้อก่อยเป๋นก่อยไป ใส่ใจ๋กำเดวก่อจั้ง