Биһиэхэ наада:
- үүт – 1 ыстакаан (280 мл);
- уу – 1 ыстакаан (280 мл);
- сымыыт – 1 уст.;
- туус;
- саахар – 2 ч.нь.;
- бурдук – 400 гр;
- мас арыыта ыһаарыыга.
Хас биирдии хаһаайка алаадьы астыырыгар тус бэйэтэ рецептээх, анал ньымалаах буолар. Мин ийэм бу рецебинэн астыыр буолан, куруук маннык астыыбын. Ким эрэ сымыыта суох охсор, ким эрэ саахар куппат, ким эрэ туустаабат. Ол эрэн барыта ис санааттан, үөрэн-көтөн туран оҥордоххо ханнык баҕарар алаадьы минньигэс буолар. Мин алаадьы буһарарбар бу икки быраабыланы тутуһабын. Бастатан туран, үүт сылаас буолуон наада, холодильниктан ылыллыбыт тымныы үүт буолбатах. Иккиһинэн, ыһаарылыыр арыы наһаа элбэх кутуллубат.
Бастаан ууну, үүтү кутабыт. Сымыыт, туус, саахар эбэбит, ытыйабыт уонна кыра-кыралаан бурдукпутун кутан убаҕас соҕус тиэстэ мэһийэн таһаарабыт.
Эрдэттэн сылытыллыбыт мас арыытыгар кыра хомуоһунан төп-төкүнүк алаадьылары кутан ыһаарылаан ылабыт. Хостуургутугар иһиккит түгэҕэр салфетката тэлгээриҥ, арыытын оборорун курдук уонна алаадьылары туруору уурталаан сааһылааҥ. Оччоҕо алаадьы арыыта аҕыйах буолар.
Минньигэстик аһааҥ!