رەنج سەنگاوی بۆ دۆخی حەوزە ماسییەکانی تەقتەق سەردانێکی مەیدانیی ئەو ناوچەیە دەکات و لەگەڵ چەند خاوەن حەوزێک قسە دەکات.
لە کاتی چوونەسەر حەوزێکی ماسی، رەنج سەنگاوی سەیرێكی ئەو بووكەڵانەشی كرد، كە لە قەراخی حەوزەكان دروستکراون، هۆکارەکەشی ئەوەیە تاوەكو باڵندەكان وابزانن مرۆڤە بۆ ئەوەی ماسییەكان نەخۆن، بەڵام وەك مەلا نووری خاوەن حەوز دەیگووت "هەر دوو و سێ رۆژی سەرەتا لەم بوكەڵانەش دەترسن كە زانیان ناجوڵێنەوە ئیتر لەوانەش ناترسن و لە ماسیی خواردنی خۆیان بەردەوام دەبن".
هەر باڵندەكان نین كە بوونەتە كێشە بۆ مەلا نووری و هاوپیشەكانی لە ناحیەی تەقتەقی سەر بە قەزای كۆیە، بەڵكو هاوكاریی نەكردنیان لەلایەن بەڕێوەبەرایەتی سامانی ماسی كوردستان بۆ رووبەڕووبوونەوەی ئەو جۆرە نەخۆشیانەی روو لە ماسی دەكات گرفتێكی دیكەیانە.
مەلا نووری دەڵێت "بەڵێنی زۆرمان پێدراوە، بەڵام هیچ هاوكاریی نەكراوین لە 2020ـدا بەهۆی نەخۆشیی كەڕووی ماسییەوە بایی 80 ملیۆن دینار ماسیمان لەنێوچوو".
ماسیی و گۆشتی گوێدرێژ
"هەموو ئەو قسانە دیعایەبوون كە دەیانگووت هەندێ لە حەوزەكان گۆشتی گوێدرێژ دەدەنە ماسی، نە من ویژدانم قەبووڵ دەكات شتی خراپ بدەمە ماسییەكانم نە هاوكارەكانیشم ئەو كارە دەكەن". رزگار نووری كە حەوزی بەخێوكردنی ماسیی هەیە، جگە لەو دڵنیاكردنەوەیەی خەڵكی، بەهەمان شێوەی مەلا نووری هاوپیشەی جەختی لەوكردەوە كە باڵندەی ماسیی خۆرە گرفتێكی هەرە سەرەكیانە. ئەو دەڵێت "حەوزی خزمێكمان لە پێنج هەزار ماسیی 300ی تێدا مابوو، هەمووی قەلمراوی خواردبووی".
لەبارەی گەورەترین ماسیی نێو حەوزەكانیشیان، رزگار نووری گوتی "گەورەترین ماسیی نێو حەوز كە بینیومە 13 كیلۆگرام و نیو بووە".
بەشدار عوسمان یش كە خاوەنی حەوزی بەخێوكردنی ماسییە باسی لەوە كرد خەڵكی تەقتەق 40% مووچەخۆرن، ئەوانی دیكەیان خەریكی كشتوكاڵكردن یان خەریكی بەخێوكردنی سامانی ماسین، بەشدار رێنمایی خاوەن حەوزەكان دەكات، لەگەڵ جۆرەكانی دیكەی ماسیی، ماسیی جۆری سیلڤەریش بەخێو بكەن چونكە "ماسیی سیلڤەر هەموو پاشماوە و پیساییەكانی نێو حەوز دەخوات".