دحيه مربووعه
1- باسم الله نبدا يخواني
ونلاعب زين القيفاني
على الله تزبط الدحه
ونرجع وقت زماني
2- يابو ثنايا لميعي
قوم العب ردنك وسيعي
ون زل لساني بكليمه
هرجك عقلبي ربيعي
3- يابو ثنايا يوجن
جنكي الركايب يخجن
لو ودكي تصلِ المدينه
يطوفن بكيه ويحجن
4- العب يا زين الاوصافي
هي يابو ثنايا سخافي
لو قربك درب المنيه
لقدم عليك وما اخافي
5- قوم العب لهن يا نوره
الشايب قام اباكوره
لو يطول عمرك وتعيشه
سيور القبر تزوره
6- يا راكب على الميدوبي
وصل سلامي لمحبوبي
وقله من عقب فراقه
ماغير التتن مشروبي
7- ياراكب على المسبوتي
اردفلي راع الزغروتي
اعرفك راكب لك جيد
وقليبك ما يهاب الموتي
8- يا راكب على السبوقي
حلفتك تردفلي شوقي
اعرفك راكب لك جيد
لا بيحرن ولا بيبوقي
9- ايش ودي اوصف واقولي
دنيا عجيبه من حولي
يوم تسمع باخبار الدنيا
تحساب راويها مهبولي
10- صار الجار ميقدر جاره
وعلى بعظنا الشطاره
الله من وقتن لا يعيده
اتحط اخيك اشاره
11- دنيا دنيه وقلابه
قليل اللي يصون صحابه
أوكانو بيصونو الغريب
اليوم بخونو القرابه
12- دنيا وقل فيها التقديري
وقلوب تحقد زالبعيري
ان جيت بتنصح خويگ
بحسك ما تريد له خيري
13- جت عادات واقفت عاداتي
وصار الحق غير بالليراتي
كان كلام الحق مبدا
يرحم الوقت الي فاتي
14- ملعون ابوها من عيشه
العالم صارت درويشه
تركب لك خلقت سياره
بقولو تاجر حشيشه
15- ادخل على الله دخيلي
كل يوم بنسمع قتيلي
هيذي حقيقه وبحكيها
صار قتل الروح مو ثقيلي
16- قل الخير وزاد الشري
عند اهل البلد والبري
نختمها بصلاة محمد
ونعوذ مجهنم والحري