სამი წელი უკრაინაში ომის დაწყებიდან

თარიღი, რომელმაც მსოფლიოს დღის წესრიგი შეცვალა. სამი წლის წინ, 2022 წლის 24 თებერვალს რუსეთმა უკრაინის წინააღმდეგ ომი დაიწყო. მოსკოვის მხრიდან ლუგანსკის და დონეცკის ე.წ. დამოუკიდებლობის აღიარებას ფართომასშტაბიანი საომარი მოქმედებები მოჰყვა. ასეულ ათასობით მსხვერპლი, განადგურებული და დაცარიელებული ქალაქები, დაბომბილი შენობები, სამხედრო და სამოქალაქო ინფრასტრუქტურა, ინტენსიური დაბომბვები, იერიშების სამიზნეებად ქცეული სტრატეგიული ენერგეტიკული ობიექტები - სამი წლის განმავლობაში ბრძოლების ეპიცენტრად იქცა უკრაინის არაერთი ქალაქი და დასახლება, რამაც დამანგრეველი შედეგები გამოიწვია. ომის დაწყებიდან დღემდე უკრაინამ აშშ-დან და ევროპიდან ფინანსური და სამხედრო დახმარების არაერთი პაკეტი მიიღო, სამი წელია, რუსეთის წინააღმდეგ მკაცრი სასანქციო პოლიტიკა მოქმედებს, თუმცა ამ დრომდე ცეცხლის შესაწყვეტად მიმართული ყველა დიპლომატიური ძალისხმევა წარუმატებელი აღმოჩნდა. გამანადგურებელი ომის სწრაფად დასრულება პრიორიტეტია აშშ-ის ახალი პრეზიდენტისთვის, რომლის პოზიციაა, რომ სამი წლის წინ ომის თავიდან აცილება შეიძლებოდა. ახლა საერთაშორისო საზოგადოების მთელი ყურადღება მიმართულია რუსეთსა და ამერიკას შორის დაწყებული მოლაპარაკებისკენ, რომლის პირველი რაუნდი უკრაინის და ევროპის მონაწილეობის გარეშე წარიმართა. უსაფრთხოების გარანტიებს ითხოვს უკრაინის პრეზიდენტი, რომელსაც მოლაპარაკების გაგრძელება ამერიკის, რუსეთის, უკრაინის და ევროპის მონაწილეობით ესახება. ეწვიეთ ჩვენს საიტს - https://1tv.ge/ მოიწონეთ ჩვენი გვერდი - https://www.facebook.com/1stchannel.1tv.ge გამოიწერეთ ჩვენი არხი - https://www.youtube.com/user/GeorgianPB/ ვიდეო წარმოადგენს საზოგადოებრივი მაუწყებლის საკუთრებას. მისი გავრცელება შეგიძლიათ მხოლოდ ბმულის გაზიარებით. დაუშვებელია მასალის ჩამოტვირთვა და სხვაგან ატვირთვა, ამ შემთხვევაში მაუწყებელი უფლებას იტოვებს მიმართოს შესაბამის ზომებს.