Президент Садыр Жапаров бүгүн, 15-ноябрда Кара-Суу районунун Жаңы-Барак айылынын ачылышына катышты.
Бул айыл Өзбекстандын аймагындагы Барак эксклавынан көчүрүлүп келген тургундар үчүн түптөлдү. Жаңы-Барак айылынын тургундары өлкө жетекчилигине ыраазычылык билдиришти.
Садыр Жапаровдун айтымында, эми турак үйлөрдүн жанына көп кабаттуу үйлөр курулат. Ал эми асфальт төшөлбөй калган көчөлөргө жазында асфальт төшөлөт.
«Ушунун жанына кошуна кылып бийик кабаттуу үйлөрдү салабыз. Мен тапшырма бердим, жакында келип, ишти башташат. Жетпей калгандарга, үйдө бир келин, эки келин кармап отургандар бар да, ошолорго беребиз. Бирок ипотека аркылуу 20-25 жылга деп берилет. 5 кабат болобу, 9 кабат болобу, канча бийик салса, ошончолук жакшы», - деди президент.