زه څوک یم ؟
ها قصه نه یم، چې هېره په وختو شم
اور لمبه نه یم ، خاموشه په اوبو شم
لوړو څوکو د بابا ته شې کتلی ؟
نه یم سیوری ، چې پرته د چا په پلو شم
لمر سپوږمۍ د شغلو رنګ که در مالوم وي
زه تیاره نه یم ، اوږده په شبګیرو شم
زه د ټولو ښکلا ګانو یو مفهوم یم
زه سپېده نه یم ، چې مړه په لمر ختو شم
زه غرور یم د هغې پېغلې ملالې
ماته نه منم ، چې تښیې له جګړو شم
صداقت کې کړم عزت د خپلې خاورې
زه هغه نه یم ، چې خرڅه په پیسو شم
زما پړونۍ د بیرغ ښکلي رنګونه
څه څپه نه یم ، چې ماته په موجو شم
په یاد ولره تاریخ به ثبتومه
پټه خوله نه یم ، ګنګۍ په فشارو شم
تل به لیکم پټ ، ښکاره حقیقتونه
شګو بند نه یم ، چې وران په سېلابو شم
سپوږمۍ وردک
کال ۱۴۰۳ د دلوې میاشت ۲۴ نېټه
کال ۲۰۲۵ د فېبرورۍ میاشت
تورنتو – کاناډا
# poetry over #pashto #afghanlove #پښتو غزل #غزل #خوږغزل