- يا مُورودة
- كلمات وألحان : نضال حسن الحاج
- أداء : محمد النصري
- إيقاع : عبدالمنعم ود العوض
* تم التسجيل و المكساج بأستوديوهات البروف بواسطة مهندس الصوت بيتر.
*رابط التحميل
http://www.mediafire.com/file/8covn6oewoicjwx/YA_MAWROODA.mp3/file
****
- النص :
يا مورودة ..
مالِك والبرِد صَبَّاحِي
نارِك في العُضام موقودة ؟
والقُدرة القبيل شايلاكِ
كيفن قبَّلَت مهدودة ؟
والضُل مالو صَدَّ وفَرَّ
وإنتِ مجهجهة ومَغرودة ؟
****
ما تِنجمّي يا مورودة
الشمّْ ما بتوفَّي عُهودا
والليل والصهيل والقمرة
ديل جت حودقن لي عُوده
والأدَّى الحنان بنوتو
لي شِنّ صَبّحِك موؤودة ؟
والخلق المَمحَّنة راجية
من قلبك تَلم واقودة
****
يا مورودة ..
يا ملكة خزاين الفرحة
مَردومة السنابل الجافة
وحارياك البيوت مبروكة
ما بتِتلَقِّى خيرِك كافَّة
الحمى البتهري الجتَّة
منك شايلة نارا ولافة
والبحر المسجَّم وجعة
راجيك والقدم في الحافة
****
يا مورودة ..
حولين .. والمطر ما سال
ورقد بي موجو يا مورودة
نيلنا الفي العطش واصال
حولين والبلاد مُتوحِمالا
علي أتر تربال
مشلهتة من وقوع أب ريَّا
لي العينه أم غياباً طال
****
هي حولين إلا من قُبَّال
خِبرناك في المحق بتمدِي
حارينّك محل ما حزِنا
تقطعي من هَناكِ وتدِّي
عارفنِك تهدِّي الدنيا
بس بي هَينه ما بتنهدِّي
والدرب البنسلكو ليكِ
لي زُولا سواك ما بودِّي
****
يا مورودة ..
لامتين يعني كُل ما الدنيا
تتكفّت تكوني خدودا ؟!
كيفن والظروف جبَّارة
شايلة قُصاد وشيها مَلوده ؟!
والخوف البِكُتْل الفارس
الخابرَةَ الهوايد دُودا
مالِك فاردة ليهو وشيكِ
لا سيف لا دِرع لا خودة ؟!
****
يا الحُرة التبيت بالجوع
وتمرق للضيوف موجودة
الكِلية التَصفِّي الجمرة
كيف ما تِنقلب مهرودة ؟!
والناس مالا هسع جايطة ؟؟
ما دام .. تمت المعدودة !
قبيلك كُنتي جِتّة وماشة..
واسع جِتّه راجية بَرُوده !!
****