كل دارنّ ارجعت وانا سناوي
عزتي للي سواتي عزتي له
زادت الحمى ورحنا للمداوي
والمداوي زود الحمى مليله
ياجميله قام يطوي الحال طاوي
والله ان كبدي على شوفتس غليله
والله ان قلبي على الاما شفاوي
غير مافي ايدي ولا فيديتس حيله
سجليني في علم حبتس فداوي
انا مجنونتس عقب مجنون ليلى
يارقبت الخِشف ياعين النداوي
ياسراجيف الذلول المستحيله
يامناة تنقصر عنها المناوي
ياخيار الدهم يالقَب الاصيله
لعنبوتس انتي مكاسر عُود جاوي
ملبستس سندس وشربتس سلسبيله
لو تمرين الشيوخ اهل الفتاوي
عودو مثلي يجرون الطويله
من عَشق شرواتس والا لايهاوي
الترفع عن بعض الاشياء فضيله