20200421民生社區健康福氣站教材。
佇銀髮族健康福氣站開呂柳仙唸歌欣賞已經一冬矣，雖然一禮拜才一改，看著遮的大兄大姊遮爾期待，閣較無閒我嘛愛閣繼續落去。
每一塊CD雖罔是短短二十捅分，聽音拍字揣解說佮後製攏就愛了咧四、五點鐘以上，毋過看著遮的老大人一冬落來，已經共「聽台語就是愛配合台語文」當做是四常、理所當然的代誌，彼種講袂出喙的成就感真正會使人きもち不止仔 giang。怹講較早的老人課攏是 one more two more，誠濟人攏無法度繼續落去，這馬有這種古早時代（怹彼个年代）的歌仔通聽閣會當學著台語字，怹絕對袂欠席。
今仔日特別播送一齣まんが，欲試看覓仔遮的大兄大姊喙講的「攏看有」敢有影？這有30集無仝款的台灣民間故事，講實在的我毋知影這馬版權是佗一間出版社的，所以共用做聯結才會當開，無公開。仝款，台語字幕是我重做的，欲予人學台語猶閣囥華語字幕是誠無負責任的代誌。
https://youtu.be/64QQ_wox6Hw