معظم الهداهد.. أو اللي عندهم ADHD مبدعين بطبيعتهم.. و أصليين.. مابيعرفوش يقلدوا حد ولا يمشوا ويا القطيع ولا يعملوا زي ما الناس بتعمل و خلاص.. دايما بيفكروا زي ماقلنا برة الصندوق.. لأنهم مش شايفين الصندوق أصلا.. و دايما حاسين ان فيه دافع جواهم انهم عاوزين يعملوا حاجة جديدة.. أو يصمموا حاجة جديدة.. أو يخترعوا حاجة جديدة.. أو حتى يطبخوا أكلة جديدة.. دافع بيبقى عامل زي الأكلان بتاع الهرش كده..
زي ما مش هاترتاح الا لو هرشت.. برضه الهدهد مش هايرتاح الا لو عمل الحاجة دي و شاف إنجاز جديد عمله بايديه قدام عينيه.. ولو ماحصلش ده.. هايحس بالإحباط و الاكتئاب.. و هنا بقى تركاية مهمة جدا.. احنا معشر الهداهد.. لو اشتغلنا على حاجة أقل من قدراتنا الإبداعية.. مافيهاش تحدي بالنسبة لنا يعني.. بنقفل من الليلة كلها.. بنفقد الحماس و الدافع اننا نعملها.. ليه؟. فاكرين لما قلنا ان أشد عدو لينا هو الملل؟.. فطبيعي لما تشتغل على حاجة سهلة مافيهاش تحدي ليك.. هاتحس بالملل.. فهاتقفل من الليلة كلها عشان تهرب من الملل ده.. و من ناحية تانية.. لو اشتغلنا على حاج أعلى من قدراتنا بكتير.. محتاجة مهارات مش عندنا مثلا.. بنحس بالإحباط و الهزيمة و الانكسار .. و الانسحاق.. حرفياً.. بنخش في دايرة جلد الذات بقى.. و دي مشكلة كبيرة عند الهداهد.. عشان كده لازم ندور على التحدي المناسب.. لا يكون عبيط و سهل بالنسبة لنا.. لأنه هايكون ممل.. ولا يكون صعب قوي و أكبر من قدراتنا.. لأن هايدمر ثقتنا بنفسنا.. و لكن.. لو لقينا التحدي المناسب.. اللي أصعب من قدراتنا بسنة بسيطة.. بس مش مستحيل.. اتفرج بقى على اللي بيحصل.. عظمة.. الواحد مننا بينور كده.. بتلاقي فراشة فرح نورت فوق دماغه!
فإيه هي الحاجة اللي لما بتشتغل فيها بتحس بالإحساس ده؟.. ايه هي هوايتك؟.. ايه شغفك؟.. ايه المجال اللي بتلاقي فيه درجة التحدي المناسبة ليك.. اللي لا هو سهل قوي لدرجة الملل.. ولا صعب قوي لدرجة التعجيز؟
دور على السوبر باور بتاعتك.. شغفك.. الحاجة اللي بتحب تعملها و بتلاقي نفسك فيها..
للدعم على Patreon :
https://www.patreon.com/ahmedbehiry
اشترك في القناة الرسمية على تليجرام:
https://t.me/ABehiry
الصفحة الرسمية لاحمد بحيري علي الفيسبوك
https://www.facebook.com/GhasilMokh
الصفحة الرسمية علي تويتر
https://twitter.com/ahmedbehiry
اشترك في القناة لمتابعة الحلقات الجديدة
http://goo.gl/2KheJZ