#MahamevnawaDubai#DahamManjusawa#DubaiTemple
ශ්‍රි සද්ධර්මය ශ්‍රවණය කිරීම අප ඉතා ගෞරවයෙන් කළ යුතු දෙයකි. තාක්ෂණික මාධ්‍ය මෙවලම් අධික මෙවැනි කලක ධර්මය - අධර්මය වෙන් කර ගැනීමට අතිශය අපහසු ය. ධර්මයේ වෙස් ගත් අධර්මයන් අන්තර්ජාල අවකාශය තුළ බහුලව සැරිසරයි.
අපට අවශ්‍ය වන්නේ එකිනෙකාගේ පෞද්ගලික අදහස්, මතවාදයන් නොව ඒ භාගවත් අරහත් සම්මා සම්බුදුරජාණන් වහන්සේගේ දහම් අනුශාසනය යි. උතුම් බුද්ධ වචනය උපුටා දක්වමින් නිරවුල්ව, නිවැරදිව සහ සරලව ' බුදුරජාණන් වහන්සේ වදාළේ කුමක් ද? ' යන්න පහදා දීම මෙම කෙටි දහම් දේශනා මාලාවේ අරමුණ යි.
ත්‍රිපිටක බුද්ධ වචනය එකම සත්‍ය ධර්ම ගබඩාවකි. මුළුමනින් ම සත්‍ය වචනයෙන් පිරී පවතී. ඒ සදහම් භාණ්ඩාගාරයේ නොයෙක් මංජුසා තැන්පත්ව පවතී. එකෙක නම දීඝ නිකාය ය. තවෙකක් මජ්ඣිම නිකාය නම ගනී. තවෙකක් සංයුක්ත නිකාය ය. අංගුත්තර නිකාය නමින් ද මංජුසාවකි. මෙසේ නොයෙක් නාමයෙන් යුතු මංජුසා තුළ අමිල වූ සදහම් පඬුරු පිරී පවතී. ඒ එකිනෙක මංජුසා විවර කොට ඔබවෙත ලබාදෙන සදහම් පඬුරු මහත් ශ්‍රද්ධා ගෞරවයෙන් අසා , මතකයේ රඳවා, නුවණින් විමසා , ජීවිතයට එක්කරගත හැකි නම් ඔබ ඉතා පිනැතියෙකි ; නැණැතියෙකි. මේ යුගයේ වසන අතිශය භාග්‍යවන්තයෙකි.
මේ දහම් පද එකිනෙක ගෞරවයෙන් අසන්න. එහි කියැවෙන දෙසුම් ත්‍රිපිටක බුද්ධ වචනයෙන් සොයා නැවත නැවත කියවන්න. ඔබේ දහම් දිනපොතෙහි සිත් ගත් දහම් පද නිරවුල්ව සටහන් කරගන්න. ජීවිතයට පුරුදු පුහුණු කොට ජීවිතය මුලුමනින් ම සුවපත් කරගන්න.
ඔබට මේ ගෞතම බුදු සසුනේ පිළිසරණ සලසා ගන්නට වාසනාව ලැබේවා!
තෙරුවන් සරණයි..!
නමෝ බුද්ධාය..!