" පලවෙනි වතාවට සිරීපාදේ කරුණා කරන ඉන්න කෝඩු කාරයින්ට! 🙏
* කෝඩු චාරිත්‍ර *
🌸පළවෙනි වතාවට සිරිපා වන්දනාවේ යන අයෙක් (කෝඩු කාරයෙක්) ශ්‍රී පාදය කරුණාකරන විට හැන ගතයුතු කරුණු සහ අවශ්‍ය දේවල්
🌸 සුදුරෙදි මීටරයක්
🌸කහවතුරෙන් සෝදාගත් පඩුරු
🌸පඩුරු ගැටගැසීමට රෙදි
🌸ඉදිකටු නූල් බෝල
🌸 විටකන හුනු පැකට් එකක්
🌸 තෙල් මල් හදුන්කූරු
🕵️ හොදින් මතක තබාගන්න ඔබ මේ යන්නට සැරසෙන්නේ කා බී විනෝද වන ගමනක් නොව,
ඔබ යන්නේ සමන් දෙවියන්ගේ අඩවියේ වැඩ සිටින සිරිපාද පත්මය වැද පුදාගැනීමට බව,
🌻 ඔබ මුලින්ම කරුණාකරනවානම් දවස් තුනක්වත් පේවී වන්දනාවේ යෙදෙන්න. මෙය ඉතා පැරණි චාරිත්‍රයක් වේ. සමන්දෙවියන්ගේ බැල්ම ආරක්ෂාව ශ්‍රී පාද අඩවියෙහි පවතින නිසා ඔබ පේවී යන්නේ නම් එය ඔබට වඩා හොදය. එය ඔබගේ සිතටද සැනසීමකි. ඔබට වැදීමට චාරිත්‍ර දන්නා නඩේ ගුරෙක් සිටීනම් ඔහුත් සමග කරුණාවේ යෙදෙන්න.
🌻 පලාබත්ගල මාර්ගයේ ගමන් කරන විට කෝඩුකාරයා ට මුලින්ම හමුවන්නේ පලාබත්ගල රජමහා විහාරයයි. ඔබ විහාරයට ගොස් පන්සිල් සමාදන් වී විහාරයේ ඇති සමන් දේවාලයට ගොස් කපු මහතා ලවා පඩුරු ගැටගසා ගැනීමට වගබලා ගන්න.
🌻සමන් දෙවිහාමුදුරුවන්ගේ පිහිටයි ආරක්ෂාවයි කියා සිරිපාකරුනා කිරීමට පටන්ගන්න. ඒ යන ගමනේදී වාචාල කියවීම් ඕපාදූප සහ අවකැපෙන වචන කියා කට වරද්දාගන්න එපා.
🌻 ලිහිනිහෙල අම්බලමට ඉහලින් ඇති ස්ථානයට පඩුරු දමා පන්සිල් ගෙන කරුනාකරන්න. ඉහලින් හමුවන ලිහිණිහෙල අසලට ගොස් "ලිහිනි අක්කේ " කියා ලිහිනි අක්කාට කතා කරන ගමන නැවත පටන් ගන්න.
🌻කටුකිතුල වංගුව දානශාලාවේ ගිමන් හැර එතනටද පඩුරු දමා ඉහාලට කරුණාකරන්න. කලුගගෙන් දිය පොදක් බී ඉහලට කරුණා කරන කෝඩුකාරයාට ඊලගට හමුවන්නේ ගෙත්තම් පානයි.බුදුරජාණන් වහන්සේ සිරිපා පියුම තැබීමට යන අවස්ථාවේ උන්වහන්සේගේ සිවුර ඉරි එය මැසූ ස්ථානය ලෙස ගෙත්තම් පාන හඳුන්වයි. එය සිහිපත්වීමට ක කෝඩු කාරයන් ගෙත්තම් කිරීමේ චාරිත්‍රය ගෙත්තම් පානයේදී සිදුකරයි. මුලින්ම ඉදිකටුවට නූල ඇමිනීම කෝඩුකාරයා විසින් සිදුකළ යුතුය. ඉන්පසු ඔබ ගෙන ආ සුදු රෙදි යාරය කරට දමා ඒ හරහා නූලක් ඇදීම කරන්නේ නඩේගුරාය. එවිට ඔහු ගෙත්තම් කවියක් කියයි ඉන්පසු ඔබද ගෙත්තම් කවිය කිව යුතුය.
💮 ගෙත්තම්පානට මුනි රජු වැඩලා
එලුසම් දිවිසම් ආසන කරලා
ඉදිකටු නූලුත් සුරත දරාලා
ගෙත්තම් කෙරුවයි මලුව බලාලා
ඉන්පසු නූල සුදු රෙද්ද හරහා ඇද එය කෝඩුකාරයාගේ අතට දෙනු ලබයි. එවිට කෝඩුකාරයා ගෙත්තම්පානේ නූල් පන්දුව ඇද එහි රැඳවීම සිදුකරයි. මෙය කෝඩු කෙනෙකුට සිරිපා වන්දනාවේ ඇති ප්‍රධාන චාරිත්‍රයකි. ඉන්පසු සුදු පිරුවාටය නවා බෑගයේ දමා නැවත කරුණාවේ යෙදෙන්න.
🌻 ගෙත්තම් පානෙන් පසුව ඔබට හමුවන්නේ ධර්මරාජ ගල් පර්වතයයි. කෝඩුකාරයන් විසින් මෙම ගලෙහි පඩි ගණන් කිරීම සිදුකරයි.
🌻 ධර්ම රාජ ගල තරණය කර ටික දුරක් යන විට සීත ගඟුල හමුවන අතර කෝඩුකාරයන් අනිවාර්යෙන් මේ ස්ථානයේ නා පිරිසිදු වී සුදු ඇඳුමෙන් සැරසිය යුතුය.
🌻 පිරුවාට ඇඳගත් කෝඩුකාරයාට මීලඟට හමුවන්නේ හැරමිටි පානයි. එම ස්ථානයට ශ්‍රී පාද කන්ද මැනවින් පෙනෙන අතර දුර සිට සිරිපා වන්දනාව මෙම ස්ථානයේදී සිදු කළ හැක.
🌻 හැරමිටි පානෙන් පසුව කෝඩුකාරයාට ගල් වංගෙඩිය හමුවෙයි. එය තුළට පඬුරු දමා ඉහළට කරුණා කිරීමද චාරිත්‍රයකි.
🌻 ශ්‍රී පාදයේ වන්දනාවේ යෙදෙන කෝඩු ඇතුළු සියලු දෙනා තොරන් බැඳ පිළිගැනීමට සාදා ඇති මකර තොරණ මීළඟට හමුවේ. එහිද පන්සිල් ගෙන සමන් දෙවියන් වැඳ කරුණා කිරීම සිදුකළ යුතුය.
🌻 ඉන්පසු මෑල්ල මල කඳුර අඩියාලම තැන්න පසුකර ශ්‍රී පාද කන්දට පිවිසෙන කෝඩුකාරයා මහගිරි දඹපසු කිරීමෙන් පසුව ඇහැළ කණුවට ළඟා වන අතර එහිදී පන්සිල් ගෙන හුණු ටිකක් ඇඟිල්ලට ගෙන "මා ඉතාමත් යහපත්ව මත්ද්‍රව්‍යවලින් තොරව සිරිපා කරුණා කරන බවට පොරොන්දු වී" කණුවෙහි හුණු ගා නළල ගැසිය යුතුය.
🌻 ඇහැළ කණුව චාරිත්‍රයෙන් පසුව අහස් ගෞවුව තරණය කර මළුවට පිවිසෙන කෝඩුකාරයා මල් හඳුන්කූරු පූජා කර පත්මය වැඳීමට යා යුතුය. එහිදී නඩේ ගුරා විසින් කෝඩෝකාරයා ගෙත්තම්කර ගෙන ආ සුදු පිරුවාටය පද්මයෙහි එළා ඒ මත කෝඩුකාරයාගේ නළල ගැසීම සිදු කරයි.
ඉන්පසු මා බුදුරජාණන් වහන්සේගේ සිරිපා කරුණා කළා යැයි සිතා සතුටු වී බුද්ධාලම්භන ප්‍රීතිය පළ කළ හැකිය. 🌸
🌼 මෙය කියවන ඔබ විසි එක්වන සියවසේ ඉපිද ඇති කෙනෙකු විය හැක. සමහර විට ඔබට මෙය විහිළුවක් ද විය හැක. සමහරු මේ කිසි දෙයක් නොකර සිරිපා කරුණාකර, ඔවුන්ට කිසි කරදරයක් වුණේ නැතැයි මේවා බොරු ඇයි මත ගොඩනගාගෙන සිටිති. මතක තබා ගන්න මෙය අවුරුදු දහස් ගණන් තිස්සේ මිනිසුන් ගෙවල් දොරවල් පවා ළමයින්ට ලියා දී, ජීවිත ආශාව අත ඇර, සිරිපා කරුණාවේ යෙදුණ කාලයේ සිට පැවත එන, චාරිත්‍රයන් බව. ඔවුන් මෙම චාරිත්‍රයන් බොරු යැයි සිතා නොකරුවේ නම්, මෙය ආදම්ගේ පාදය ලෙස ප්‍රචාරය වී මෙහි සත්‍යය යට යන්නට ඉඩ තිබුණි. මෙම චාරිත්‍රයන් තුළ පවතින්නේ
🍃 බුදුරජාණන් වහන්සේගේ ආගමනය සිහිපත් කිරීම.
🍃 සමන් දෙවියන්ට කරන ගෞරවය දැක්වීම.
🍃 වන්දනාවේ යෙදෙන විට පවතින විනය හික්මීම.
ඇතුළු හොඳ දේ පමණක්මය. 🙏"
මූලශ්‍රය-මුහුණුපොතේ සමනල කන්ද රසික එකමුතුවෙනි.