၂၀၂၅ ကို အဓိပ္ပါယ်ဖွင့်ဆိုမယ့် အညာသားPDFများ | People's Spring
၂၀၂၅ ကို အဓိပ္ပါယ်ဖွင့်ဆိုမယ့် အညာသားPDFများ
ရှိန်း/People's Spring
ရှမ်းပြည်နယ် မြောက်ပိုင်း က ၁၀၂၇ စစ်ဆင်ရေးမှာ တော်လှန်ရေးတပ်တွေနဲ့ အတူ သွားရောက်တိုက်ခိုက်ခဲ့ တဲ့ အညာဒေသက PDF တွေဟာစစ်ပညာတွေ သင်ယူလာပြီး ပြန်ရောက်ကြပြီ ဖြစ်လို့ အာဏာသိမ်းစစ်တပ်ကို အရှိန်မြှင့်တိုက်ခိုက်ဖို့ စိတ်အားထက်သန်နေကြပြီဖြစ်ပါတယ် ။
အညာ ဒေသက PDF တွေ ၁၀၂၇ စစ်ဆင်ရေး နဲ့ ရှမ်း-မန်း စစ်ဆင်ရေးတွေက ဘာတွေသင်ယူတက်မြောက်လာသလဲ လို့မေးရင် ဝက်လက်မြို့နယ် မှာဇန် နဝါရီ ၅ ရက်နေ့က ဖြစ်ခဲ့တဲ့ တိုက်ပွဲကြီး နှစ်ခုက အကောင်းဆုံးအဖြေ ပေးပါလိမ့်မယ် ။
ဇန်နဝါရီ လ(၄)ရက်နေ့မှာ ရွှေဘိုမြို့ အမှတ်(၈)စစ်အခြေခံလေ့ကျင့်ရေးတပ် (စခတ-၈)ကနေ တပ်မ(၃၃) တပ်အရာရှိတွေဦးဆောင်တဲ့ထောက်ပို့တပ်က ဟန်လင်းမြို့ဟောင်းဘက်ကတဆင့်
ဝက်လက်မြို့ဘက်ကိုထောက်ပို့ဖို့ထွက်လာပါတယ်။တချိန်ထဲမှာပဲ နာမည်ဆိုးနဲ့ကျော်ကြားတဲ့စစ်ကိုင်းတပ်မ(၃၃) ထဲ စစ်ကြောင်း ၁ ကြောင်းကလည်း မန္တလေး-ရွှေဘိုလမ်းကတဆင့် ဝက်လက်မြို့ရဲ့တောင်ဘက်ကနေ ရှိမ်းမကားရဲစခန်းထဲကိုအင်အားဖြည့်ဖို့ကြိုးစားခဲ့ပါတယ်။
ရွှေဘိုဘက်ကလာတဲ့ပထမစစ် ကြောင်းဟာ ရွှေဘို-ဝက်လက် ကားလမ်းပိုင်းကနေသွားရင် နေ့ဝက်လောက်ရောက်တဲ့ခရီးဖြစ်ပေမယ့် အဲဒီကာလမ်းကို စစ်တပ်မဖြတ်သန်းရဲပါဘူး။
အလားတူပဲ ဒုတိယစစ်ကြောင်းဟာလည်း စစ်ကိုင်းတပ်မ(၃၃)ရဲ့အနောက်ဘက်မှာရှိတဲ့ မန္တလေး-ကျောက်မြောင်း ဗျူဟာလမ်းပိုင်း အတိုင်းသွားမယ်ဆိုရင်လည်း ရှိမ်းမကားရဲစခန်းကို ကားနဲ့၃နာရီ လောက်နဲ့ ရောက်မယ့်ခရီးပါ။ဒါပေမယ့် ဘယ်ကားလမ်းကိုမှစစ်တပ်အသုံးမပြုရဲတာမို့ တောလမ်းတွေကိုရွေးသုံးခဲ့တာပါ။
ဇန်နဝါရီလ ၅ ရက်နေ့မှာပဲ ဗိုလ်ကြီးမျိုးမင်းသူဦးဆောင်တဲ့ စခတ-၈ က အင်အား ၇၇ ဦးပါ စစ်ကြောင်းဟာမှတ်ထိကျေးရွာနဲ့ မင်းကုန်းကျေးရွာကြားအရောက်မှာ PDF တွေရဲ့ ကြားဖြတ်တိုက်ခိုက်တာကိုခံခဲ့ရပါတယ်။စစ်သား ၇၇ ဦးပါတဲ့စစ်ကြောင်းဟာ ၄၇ ဦးသေဆုံးပြီး စစ်သုံ့ပန်း ၆ဦးဖမ်းမိပြီး လက်နက်မျိုးစုံ ၄၄ လက်ကို PDF တွေကသိမ်းဆည်းရရှိခဲ့ပါတယ်။ ထောက်ပို့စစ်ကြောင်း တကြောင်းလုံးဟာ ရှမ်းမြောက်ပြန် အညာသား PDF တွေရဲ့ လက်စွမ်းပြမှုနဲ့ စစ်ကြောင်း ၁ ကြောင်းလုံးပျက်သွားတာပါ။
ဒီတိုက်ပွဲမှာသေဆုံးသူတွေရဲ့ လက်မောင်းတံဆိပ်တွေမှာတပ်မ(၃၃)ရဲ့ တံဆိပ်တွေကိုတွေ့ရပါတယ်။
ဒါအပြင် အတိုက်ခံရတဲ့ စစ်ကြောင်းကိုစစ်ကူပေးဖို့ ဝက်လက်မြို့ကနေ ဇန်နဝါရီ ၅ ရက်ညနေ ၃ နာရီကျော် ထွက်လာတဲ့ ဗိုလ်ကြီးကျော်မင်းခိုင် အပါအဝင် အင်အား (၃၀ )ဝန်းကျင်ရှိတဲ့ စစ်ကူစစ်ကြောင်း ကိုလည်း PDF တွေကထပ်မံ ကြားဖြတ်တိုက်ခိုက်ခဲ့ကြပါတယ် ။ စစ်ကူးစစ်ကြောင်းလည်းဗိုလ်ကြီးကျော်မင်းခိုင်အပါအဝင် ကိုးဦးဒဏ်ရာရပြီး ပြန်ဆုတ်သွားရပါတယ် ။ စစ်ကူလာတဲ့အထဲ စစ်သားတွေအပြင် မီးသတ်ရုံး အရာခံဗိုလ်၊ ပျူစောထီးတွေ ပါ ပါခဲ့တာပါ။ဒဏ်ရာရသူတွေကို ဝက်လက်မြို့ဆေးရုံပို့ပြီး ဆေးကုကြရပါတယ် ။
စစ်တပ်ကို ကြောင်းပျက်သွားအောင် အမှတ် (၂) ရွှေဘိုခရိုင် ကွပ်ကဲရေးမှူး ညွှန်ကြားချက်နဲ့ ရွှေဘိုခရိုင် တပ်ရင်း (၁၊ ၂၊ ၄၊ ၅၊ ၁၅၊ ၂၃)၊ အမှတ် (၂) ရွှေဘိုခရိုင် ကွပ်ကဲရေး ဒရုန်းတပ်ဖွဲ့၊ M.Sai Naw ဒရုန်းတပ်ဖွဲ့၊ Phoenix Wings ဒရုန်းတပ်ဖွဲ့၊ ဝက်လက်မြို့နယ် ပကဖ ပူးပေါင်းအဖွဲ့တို့က စုပေါင်း တိုက်ခိုက်ခဲ့ကြတာဖြစ်တယ်လို့ အမှတ်(၁)စစ်ဒေသက ထုတ်ပြန်ပါတယ် ။
တစ်နေ့တည်းမှာပဲ ဝက်လက်မြို့ရဲ့အရှေ့တောင်ဘက်က အုန္နဲဘုတ်ရွာကိုဝင်ရောက်တပ်စွဲထားတဲ့အင်အား(၇၀)ကျော်ပါ တပ်မ(၃၃) စစ်ကြောင်းကိုလည်း PDF တွေကတိုက်ခိုက်ခဲ့ပါတယ်။ အဲဒီစစ်ကြောင်းကို ဗိုလ်ကြီးအေးမျိုးထွန်းဦးစီးပြီးတော့ တပ်မ(၃၃)လက် အောက်ခံ စစ်ကြောင်း ဖြစ်ပါတယ် ။
ရှိမ်းမကာ ရဲစခန်းသွားဖို့ထွက်လာတာဖြစ်ပြီး အုန္နဲဘုတ် ရွာမှာ PDF တွေက ဇန်နဝါရီ ၅ ရက် မနက်အစောပိုင်း တိုက်ခိုက်ခံရတာကြောင့် စစ်သား ၂၀ ကျော်သေဆုံးခဲ့သလို ၃ဦးကို အရှင်ဖမ်းမိခဲ့ပါတယ် ။ဒါအပြင် လက်နက် ၅လက် သိမ်းဆည်းရရှိခဲ့တယ်လို့ရွှေဘိုခရိုင် တပ်ရင်း(၁၈)က ထုတ်ပြန်ထားပါတယ် ။
သေဆုံးသူတွေကို စစ်တပ်က ပြည်သူတွေရဲ့ အိမ်တွေထဲထည့်မီးရှို့ လက်စဖျောက်ခဲ့သလို ကျန်တဲ့ စစ်သား ၄၀လောက်ဟာ ဖရိုဖရဲထွက်ပြေးသွားပါတယ်။ တပ်မ ( ၃၃)ဟာ ချင်းပြည်နယ် ထန်တလန်မြို့ကို မီးရှို့ဖျက်ဆီးခဲ့တဲ့ တပ်ဖြစ်ပါတယ် ။ ရခိုင်ပြည်နယ် တိုက်ပွဲကိုလည်း အပို့ခံရသေးပြီး ရခိုင်ပြည်နယ်မှာ စစ်ရှုံးခဲ့ပါတယ် ။
နာမည်ဆိုးနဲ့ကျော်ကြားတဲ့ တပ်မ (၃၃ )လက်အောက်ခံစစ်ကြောင်းကို အုန္နဲဘုတ်ရွာမှာစစ်ကြောင်းပျက်အောင် တိုက်ခိုက်ခဲ့ကြတာက ရွှေဘိုခရိုင် တပ်ရင်း (၁၊ ၂၊ ၁၈)၊ ဒေါင်းနီ (LPDF) ပူးပေါင်းတပ်တွေဖြစ်ပါတယ် ။
အထက်ပါ စစ်ကြောင်း ၂ ခုလုံး ပြုတ်ခဲ့ ၊ပျက်ခဲ့တဲ့ ဒီတိုက်ပွဲနှစ်ခုဟာ ဝက်လက်နယ်အတွက် တကျော့ပြန်တိုက်ပွဲလို့ ပြောလို့ရသလို ၂၀၂၂ခုနှစ်နောက်ပိုင်း ဝက်လက်နယ်အရှေ့ပိုင်းကအညာသားတွေရဲ့ တကျော့ပြန်အောင်မြင်မှုလည်းဖြစ်ပါတယ်။
ဝက်လက်မြို့နယ်အရှေ့ခြမ်းဟာ စစ်ကောင်စီတပ်ကိုလက်နက်ကိုင်တော်လှန်ရေး အစောဆုံးပြုလုပ်ခဲ့တဲ့ ဒေသတွေထဲက တခုပါ။၂၀၂၁ခုနှစ်မှာတင် ဒေသခံကာကွယ်ရေးတပ် ရာဂဏန်းလောက်အထိ ဒီနယ်မြေကို အခြေစိုက်ခဲ့ကြတာပါ။မန္တလေးက UG တွေ၊တပ်တွေလည်း ဒီနယ်ကိုရောက်ခဲ့ကြတာပါပဲ။၂၀၂၂ခုနှစ်မှာ စစ်တပ် စိုးရွံ့ရတဲ့မြေဖြစ်ခဲ့တဲ့အထိ ဒီနယ်မြေကတော်လှန်ရေးအားကောင်းခဲ့ပါတယ်။
"အဲဒီတုန်းက လက်လုပ်တွေပဲရှိတာ။ကျွန်တော်တို့ကပစ်ပြေးဘဝပဲ"လို့ ရွှေဘိုခရိုင်တပ်ရင်း(၁၅)ရဲ့ခေါင်းဆောင် ဗိုလ်ကောက်ရိုးကပြောပါတယ်။
" ၂၀၂၅ မှာ အညာ ဟာ လုံးဝ ထင်မထားလောက်အောင် ပြောင်းလဲမှု တစ်ခု ကို ဖော်ဆောင်ဖို့အတွက် ကျွန်တော်တို့အဆင်သင့်ဖြစ်နေပါပြီ" လို့ရွှေဘို ခရိုင် တပ်ရင်း (၂၆ )ကပြန်ကြားရေးတာဝန်ခံကပြောလိုက်ပါတယ် ။ ။
#ludunwayoo #လူထုနွေဦး #NewsUpdate
𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴
𝗬𝗼𝘂𝗧𝘂𝗯𝗲 - https://www.youtube.com/@peoplespring
𝗙𝗮𝗰𝗲𝗯𝗼𝗼𝗸 - https://www.facebook.com/LuduNwayOo/
𝗪𝗲𝗯𝘀𝗶𝘁𝗲 - https://www.ludunwayoo.com/
𝗜𝗻𝘀𝘁𝗮𝗴𝗿𝗮𝗺 - https://www.instagram.com/ludunwayoo/
𝗧𝗲𝗹𝗲𝗴𝗿𝗮𝗺 - https://t.me/peoplespring