สู่ขวัญขึ้นบ้านใหม่ : บพ.เอกราชบุญอาจ|คุรุเทพบารมี@sukuan-online2022

สู่ขวัญขึ้นบ้านใหม่โดยบพ.เอกราชบุญอาจ @sukuan-online2022 | ศิษย์สำนักพราหมณ์เชตะวันคำสู่ขวัญขึ้นบ้านใหม่ ศรีศรีสิทธิ ชยตุ ภวัง ชยมังคละดิถี วันนี้เป็นวันดีวันดิถีสุภารีก ถึกหน่วยชื่อว่ามหามุงคุล ยังมีพญาผู้มีบุญองค์หนึ่ง เสด็จมาจากเมืองหมั้นคำพอง มาแสวงหาจองสถานที่ตั้งบ้าน เพื่อปลูกสร้างให้อยู่ชุ่ม กินเย็น ความเป็นเข็ญเข็ดขวางจังไฮบ่มีพ้อ จึงตั้งต่อปลูกแปลงไป พระเมตตรัยโพธิเจ้าว่าดีบ่อนนี้ แต่ก่อนกี้ พระเจ้าสร้างโพธิสมภาร ผาบแพ้พญามารผู้สาโหด บ่อนนี้บ่อนพระเจ้าโผดสัตตะนิกร บ่อนนางธรณีเอาคำปลูกไว้ พระแก่นไท้ว่าอยู่สวัสดี หมื่นพันปีบ่อมีโพยภัยมาต้อง บัดนี้เจ้าชินั่งอยู่ห้องแก้วกองเงินกองคำ เขาชินำกับทั้งข้อยข้าช่วงใช้หลูหลังไหลมา มีศักดาฤทธีองอาจ ฝูงหมู่ญาติได้แต่งของฝากมาหา กับทังภรรยาหนุ่มน้อย หน้าซื่นซ้อยโสภา บัดนี้จักพรรณแต่เดิมดาเค้า จัดแจ่งเข้าหาไม้ปลูกเฮือน มีใจเพียรทังเยื้อนทังยากแต่งถงหมาก ทังน้ำบั้งทิงคัวเคียหาขวนคมมีดพร้า แบกเข้าป่าดั้นคั่วดงดอน เดินโคจรมื้อแลงมื้อเช้าวันค่ำเศร้าสูญแล้วต่าวมา บางพ่องกินสุราแกมเข้า ตื่นมื้อเช้างายแล้วเล่าไป จงใจเข้าดงเลาหาชอก ไปพบพ้อลำดั้วปอดดี ไม้มีสีเอาเป็นเสาแฮก แล้วจึงแบกขวัญใส่ฟันลงตัดปลายตรงลำดีสะอาด นี่แม่นธรรมชาติไม้ค้ำไม้คูณ ลำฟันลุนเสาขวัญเป็นคู่ ที่เกิดอยู่ ฝ่ายข้างตีนดอนเหลียวเบิ่งงามสอนลอน อินทร์แปลงปลูกไว้ ตัดเอาได้มาถากเป็นเสา ไปหาเอาบ่หยุด บ่หย่อนเดินเฮฮ่อนเข้าป่าดงหนา หลายเวลาปีเดือนติดต่อ หลายพร่ำมื้อตัวเจ้าอ่อนแฮง ยามแลงเข้ายามลงปะเปล่า มื้อสืบมื้อ ป้ำไป๊สืบไป ปีเดือนได้วันยามเข้าป่าแดดแฮงย้อนฮนไหม้ค่อยเพียรปีเดือนเข้าเมษา ข้ามล่วงฝนหลั่งย้อย ฮำผ้าชุ่มเย็นบรบวรแล้วฟันเยือนหลังใหญ่ บัดนี้ ข้าจักแต่งขันดอกไม้เชิญเจ้าเข้าสู่เฮือน เขาฟันตกตอเจ้าอย่าได้หักเมือเมืองเหนือ เขาฟันตกเครือเจ้า อย่าได้หักเมือเมืองนาค เขาฟันตกฟากเจ้าอย่าได้เศร้าเสียศูนย์ ให้เจ้ามาค้ำคูณฮุ่งเฮืองเพียงอาสน์ ให้เจ้ามา สะพาสพาดอยู่ชุ่มกินเย็น ความเข็ดขวางอย่ามาใกล้ ความเจ็บไข้ก็อย่าใหได้มี ว่า.. มาเยอขวัญเอย ขวัญเสาทวนอยู่ป่าหญ้าแฝก ก็ให้มาสามื้อนี้วันนี้ ขวัญเสาแฮกอยู่ป่าดอนแค ก็ให้มาสามื้อนี้วันนี้ ขวัญแจอยู่ดอยอยู่ถ้ำ ก็ให้มาสามื้อนี้วันนี้ ขวัญเสาค้ำอยู่ป่าไม้ ก็ให้มาสามื้อนี้วันนี้ ขวัญป้านลมอยู่ดงช้างน้าว ก็ให้มาเสียมื้อนี้วันนี้ ขวัญชื่อข่าวก็ให้เอิ้นเฮียกกันมา ว่ามาเยอขวัญเอย มาพะลันอย่าช้า ให้เจ้าได้ตั้งหน้าข้ามเหล่าดอนเลามาเนอ ให้เจ้ามาจำเริญฮุ่งเฮือง เฮือนกว้าง อย่าได้ตกใจได้ห่วงอยู่สวัสดี ยอเฮือนครัวขึ้นให้ได้เป็นเฮือนราช ยอปราสาทขึ้นให้ได้เป็นยอดธาตุจอมสูง เฮือนโฮง คำเป็นรถแก้ว ยกขึ้นแล้วอยู่สวัสดี ยกเสาหนึ่งให้ได้งัวแม่ลาย ยกเสาสองให้ได้ควายเขาย้อง ยกเสาสามให้ได้ฆ้องเก้ากำ ยกเสาสี่ขึ้นได้คำเก้าหมื่น ยกเสาห้าได้ข้าวล้านหมื่นมาเยีย ยกเสาหกให้ได้เมียผู้งามมานอนพ่างข้าง ยกเสาเจ็ดให้ได้ลูกจ้างมาแต่งพาแลงพางาย ยกเสาแปดขึ้นให้ได้ชายผู้ดีผู้งามมายายแจกเหล้า แลของขวัญ ขอให้ได้มามวลงัวควายเต็มคอก ข้างม้าออกเนืองนอง เงินคำกองพอแบก เสาค้ำก็อย่าให้แตก เสาแฮกก็อย่าให้เชชวน เสาขวัญก็ให้เจ้าหมั้นแก่นให้เจ้าหมั้นปานแผ่นเหล็กแดง ให้เจ้าแข็งปานแผ่นหินลาด ให้เจ้าหมั้นปานเหลี่ยมอาจเสาสเมรุ จำเริญเป็นอาจกว้าง ห้องหนึ่งแอ้มอาจไว้แต่งบัวนาง เทียมทางเสาแฮก กลางให้มีสาบ่อแก้ว นางอาบแล้วให้อยู่สวัสดี เสาค้ำให้เป็นแก่นพลหอมชั่วพันวา เสาขวัญให้เป็นแก่นจันทน์ หอม ชั่วแสนโยชน์ เพิ่นมาซื้อให้เจ้าได้จำหน่าย ยามเมื่อจ่ายให้เจ้าได้ของดี ให้เจ้ายุ่งเฮืองศรี ปุนปันห้องไว้ผูกช้างสาร ใหญ่งายาว ห้องหนึ่งให้ลูกเขยลูกสาวเข้ามาสู่ช่วงใช้ ห้องหนึ่งไว้ให้ลูกชายแลลูกสะใภ้แสนสำมาแยง ลูกสาวแพงเครื่องคำพันฮ้อย หลอนว่าได้ลูกเขยลูกใภ้น้อยๆ มาสู่สมใจปู่เด ห้องหนึ่งไว้ถ้าสังฆเจ้ามาเทศนาสอน ห้องหนึ่งไว้บูชานึกถึงคุณแก้ว ห้องหนึ่งไว้ถ้าบิดามารดาพ่อแม่ ห้องหนึ่งไว้ให้เฒ่าแก่มาชุมนุม ห้องหนึ่งไว้ให้ขุนทางไกล หลายเมืองมาเฝ้า ห้องหนึ่งไว้ถ้าลูกเต้าและหลานเหลน ห้องหนึ่งไว้เก็บคำฮ้อย ห้องหนึ่งไว้แอ้มส้วมน้อยให้ลูกสาวหล่าเข้ามาอยู่นอน บัดนี้ ข้อยจักเชิญเอาขวัญเจ้าครัวเฮือนให้มาอยู่ เชิญเอาขวัญลูกเต้ามาเข้าสู่โฮง มาเยอขวัญเอย ขวัญเจ้า ฟันไม้เสาทวนเซาอยู่ป่าแฝก ขวัญเจ้าไปฟันไม้เสาแฮก อยู่ป่าหนามหัย ก็ให้มาสามื้อนี้วันนี้ ขวัญเจ้าไปฟันไม้เสาเซาอาบน้ำ ขวัญเจ้าไปฟันไม้เสาค้ำมัวแบกเซชวนก็ให้มาสามื้อนี้วันนี้ ขวัญจ้าไปฟันไม้สะยัวเชาอยู่ฮ่มเหมือด ขวัญเจ้าไปฟันไม้กะทอดเชาอยู่กลางดง ขวัญเจ้าไปตัดตงตัดกอน เซาอยู่โคกค้อย ๆ ก็ให้มาสามื้อนี้วันนี้ ขวัญเจ้าขึ้นโคกสูง ขวัญลงโคกค้อยให้วอยข้วมต่าวมา มาเยอขวัญเอย มาพะลันอย่าช้าเชิญทังขวัญอ่อนหล่า กุมมาราเข้ามาสู่ เชิญเอาขวัญหมู่เจ้าให้มาเข้าสู่โฮง ให้เจ้ามาทรงเฮือนชานบ้านใหม่ คันเจ้ามาฮอดแล้ว ความทุกข์อย่าให้มาใกล้ความไข้อย่าให้มี ทุกคนก็ข้าเทอญ ยถา วาริวโห ปูโร สัพพกาลัง น ขียติ อุอะ มุมะ มุนมา สัพพสิทธิ ภวันตุเต... Youtube - https://www.youtube.com/channel/UC1qLC7ktduVNPNJkKJegr2Q Facebook - https://bit.ly/3dfgGAg Facebook fanpage -https://bit.ly/2OPoIXu -https://bit.ly/2Rw7uzj -https://bit.ly/3mMbmYn e-mail : [email protected]