سنة 1970 اتقابل شاب غنى جدا اسمه ماوريتسيو غوتشى – وده كان وريث امبراطورية شركة غوتشى للموضة.. مع بنت جميلة اسمها باتريزيا مارتينيلى.. الكلام ده كان فى حفلة من الحفلات اللى بيسهروا فيها كل يوم..
المهم.. أعجبوا ببعض جدا وحبوا بعض جدا جدا.. لدرجة ان معداش سنتين وكانوا متجوزين.. شوية وخلفوا بنتين زى القمر.. كانوا عايشين فى الجنة تقريبا.. لحد ما تيجى سنة 95.. ويتقتل الشاب الجميل ده.. وريث امبراطورية غوتشى.. مين قتله؟.. مراته.. البنت الجميلة اللى كلمتك عنها.. وبعدها تنهار شركة غوتشى.. وتتباع بالكامل لشركة تانية خالص.. وتخسر عائلة غوتشى الشركة اللى بنوها على مدار سنين عمرهم.. بعد ما يخسروا ابنهم الشاب الجميل ماوريتسيو غوتشى..
ايه اللى حصل وايه حكاية شركة غوتشى عملاق صناعة الموضة فى العالم.. اللى ممكن ثمن شنطة أو جزمة واحدة فيها تكلفك مرتب سنين؟.. وليه الشابة الجميلة قتلت جوزها رغم الجنة اللى كان معيشها فيها؟.. هقولك..
فى سنة من السنين وقبل ما حد يسمع عن حاجه اسمها غوتشى.. كان فى راجل ايطالى بسيط اسمه غوتشيو غوتشى.. الراجل ده كان عنده ورشة صغيره كده لصناعة المنتجات الجلدية.. يعنى يجيب الجلد يصنع من شنطة.. يصنع جزمة.. وبتمنهم يشترى أكل ليه ولولاده وهو مروح.. لحد ما قرر انه يسافر لندن يدور على شغل.. وفعلا فضل يدور على شغل لحد ما اشتغل شيال شنط فى فندق.. لكن حظه ان الفندق ده كان فندق كبير.. مبيدخلوش غير الأثرياء.. ومع مرور الوقت.. الراجل بدأ يلاحظ شياكة الشنط والجزم الجلد اللى نزلاء الفندق دول بيشيلوها وبيلبسوها.. وهنا خطرت له فكرة قد تجدها منطقية جدا وبديهية جدا..
قال لنفسه هو أنا ليه مهتمش بشكل الشنط والجزم اللى بصنعها فى إيطاليا؟.. هو أنا ليه روتيني فى صناعة الشنط والجزم.. زى ما بهتم بالجودة.. ايه المشكلة لما أهتم كمان بالشكل.. وفعلا خد بعضه ورجع ايطاليا فتح المحل بتاعه من جديد.. والطلاينه معروفين ان ذوقهم عالى.. فيهم عرق فنى.. وبدأ الراجل يهتم بشكل الشنط والجزم اللى بيصنعها زى ما بيهتم بالجودة بالظبط.. فكانت النتيجة ان الإقبال زاد على منتجاته.. وبدل ما كان عنده محل واحد بقوا 2 و3.. ومن هنا بدأ العالم يعرف براند جديد اسمه غوتشى.. لحد ما قررت الأسرة انها تفتح فرع جديد لمنتجاتها فى نيويورك.. وطبعا ده كان حدث مهم جدا.. كل العيلة لازم تحضره.. لكن واحد من ولاد الراجل ده مكنش مهتم أوى بالموضوع.. ليه؟.. لأنه كان مشغول بالتمثيل أكتر.. من هو هذا الشخص؟.. رودولفو غوتشى.. ويبقى والد ماوريتسيو غوتشى اللى اتقتل على ايد مراته اللى كلمتك عنه..
المصادر
https://bit.ly/3MLrExx
https://bit.ly/363FPwH
#المواطن_سعيد #GUCCI