اللى حضراتكم شايفينه ده جندى سوفيتى اسمه ميخائيل كلاشينكوف.. الشاب ده سنة 1941 كان ضمن القوات السوفيتية اللى بتتصدى لهجوم الجيش الألمانى.. ولحسن حظ الاتحاد السوفيتى كله.. إن الجندى ده اتصاب فى المعركة.. تقولى ليه من حسن حظ الاتحاد السوفيتى؟.. هقولك.. كلاشينكوف كان ضمن سلاح الدبابات.. والدبابة بتاعته انضربت.. صحيح الضربة مكنتش مدمرة للدبابة.. لكنه اتصاب بشظيه من شظايا الانفجار.. وبالتالى اتنقل للمستشفى وخد أجازة لحد ما يكمل علاجه..
خلال بقى فترة علاجه.. كان كل اللى مسيطر على تفكيره.. المشاهد اللى شافها فى الحرب.. مكنش قادر ينسى منظر البنادق الألمانية الآلى اللى عماله تضرب بسرعه وقوة تصويب أعلى من البنادق السوفيتية.. وبالتالى السرعة ودقة التصويب دى كانت بتوقع كتير جدا من زمايله.. في حين ان الجيش السوفيتى مش عارف يوقع حد من جنود الجيش الألمانى.. ولأن الجندى ميخائيل كلاشينكوف كانت عنده هواية الاختراعات.. مع شوية خبره كسبهم فى ورشة ميكانيكا اشتغل فيها وهو صغير.. قرر انه لازم يخترع بندقية آلى تكون أسرع وأدق فى التصويب من البنادق الألمانية.. لكن سيدى المواطن.. كانت عنده مشكله..
مشكلة كلاشينكوف كانت فى القاده بتوعه.. كل ما يحاول يكلم حد ويطلب منه يوفر له دعم فى ورش الجيش علشان يصنع البندقية اللى بيحلم بيها.. واللى هتضمن للاتحاد السوفيتى النصر فى الحرب العالمية التانية.. والأهم انها هتوفر لبلده الحماية ضد أى معتدى يفكر بس انه يغزو الاتحاد السوفيتى.. كان يقابله الروتين الحكومى.. مفيش امكانيات نساعدك بها.. انت مفكر ان مصر.. أقصد الاتحاد السوفيتى واقف عليك؟.. احنا عندنا ألف زيك يقدروا يقدموا للاتحاد السوفيتى اللى انت عاوز تقدمه..
طيب يا جماعه ما أنا أهه.. وعاوز أقدم لبلدى كل اللى هى محتاجاه.. ساعدونى علشان أقدر أساعد بلدى.. بنقولك مفيش إمكانيات.. نغنيهالك.. وبعدين مصر مش محتاجه مساعدتك.. أقصد الاتحاد السوفيتى مش محتاج مساعدتك.. عندك حاجه تقدمها للبلد وانت ساكت قدمها.. معندكش يبقى ترجع تقعد مكانك ومتفتحش بقك..
لكن سيدى المواطن.. كلاشنكوف لم ييأس.. وراح طلب مساعدة زمايله فى الورش.. اللى وافقوا انهم يساعدوه فى ساعات الراحه.. يعنى بدل ما يرتاحوا ساعة الغدا مثلا.. يقوموا يساعدوه علشان يكمل صناعة البندقية الآلى اللى شغال عليها.. وفضل كلاشينكوف شغال على البندقية بتاعته من سنة 41.. لحد سنة 47.. 6 سنين كاملين علشان يخترع البندقية الكلاشينكوف AK-47.. واللى اتسمت باسمه.. واتصنع منها أكتر من 200 مليون بندقية.. وكانت تحفه فنيه لدرجة ان ملوك ورؤساء دول العالم كانوا بيهادو بعض بها.. وكانت سبب ان الاتحاد السوفيتى يكون من أهم صناع السلاح فى العالم.. ساعتها بس الاتحاد السوفيتى عرف قيمته.. وكرمه معنويا وماديا.. وحط تحت ماديا دى ألف خط.. لدرجة ان كلاشينكوف نفسه قال فى مره.. إن بالمكافآت المادية اللى خدها من الدولة.. يقدر يشترى أسطول عربيات من أحدث طراز.. ده غير بقى الأوسمة والنياشين والترقيات والتماثيل اللى اتعملتله..
وهنا السؤال.. تفتكر انت الاتحاد السوفيتى بجلالة قدره.. فيه كام موهوب زى كلاشينكوف محتاج بس فرصه علشان يثبت نفسه ويساعد بلده.. لكن فى نفس الوقت محتاجين نسأل نفسنا سؤال أهم.. الاتحاد السوفيتى فيه كام مسؤول قادر انه يكره الموهوبين دول فى حياتهم.. للدرجة اللى تفقدهم الأمل فى نفسهم وفى بلدهم وتموت معاهم مواهبهم اللى كانت بلدهم هى المستفيد الأول منها..
طيب احنا بنحكى الحكاية دى ليه؟.. لأن عندنا فى مصر واحد اسمه محمد الشوربجى لاعب اسكواش.. وواحد تانى اسمه حسن عواض لاعب كرة يد.. وواحد تالت اسمه فارس حسونة لاعب رفع أثقال.. وواحد رابع اسمه طارق عبد السلام لاعب مصارعة.. وواحد خامس اسمه سامح الدهان لاعب فروسية.. وواحد سادس اسمه هيثم فهمى لاعب مصارعه.. وواحد سابع اسمه أحمد بدير لاعب رمى الرمح.. وواحد ثامن اسمه أيمن حسام الدين لاعب كونغ فو.. وتاسع وعاشر.. وعد زى ما تحب..
كل دول أبطال مصريين هربوا على دول تانيه يلعبوا باسمها.. حتى ولو كانت النتيجة انهم يواجهوا لعيبه مصريين بعد كده.. يعنى يبقى مصري بيلعب باسم انجلترا مثلا زى محمد الشوربجى.. تلاقيه فجأة بيواجه لعيب مصرى بيلعب باسم مصر فى بطولة العالم مثلا.. موقف صعب جدا.. لكن ايه اللى وصلنا للمرحلة دى؟.. أقولك الله ينور عليك.. هو ده السؤال الصح.. ايه اللى وصلنا للمرحلة دى..
فى مداخلة تليفونية بين أحمد براده لاعب الاسكواش المصرى وده بطل من أبطال العالم.. وبين عاصم خليفه رئيس الاتحاد المصري للاسكواش.. كانوا بيتكلموا عن أزمة اللاعب المصرى محمد الشوربجى اللى فجأة قرر انه يلعب باسم انجلترا.. فرئيس الاتحاد بيهاجم الشوربجى وبيقول انه مرتب من زمان انه يلعب لصالح انجلترا.. وانه اتخلى عن بلده وبدأ يدخل فى سكة البلد ومش البلد.. والوطنية والخيانة.. وان البلد مش واقفه على الشوربجى.. وعندنا زيه وأحسن منه.. والجو ده..
المصادر
https://bit.ly/3MHGhAq
https://bit.ly/3QcW9xX
https://bit.ly/3HbKr2D
#المواطن_سعيد #الشوربجي