متشتكيش لحد ؟

متشتكيش لحد… لأن مفيش حد هينفعك ولا يضرك غير ربنا!
في أوقات الضيق والحزن، بنكون محتاجين حد يسمعنا، حد نحكيله اللي جوانا، حد نحس إنه فاهم مشاعرنا وحاسس بالوجع اللي بنمر بيه. ولأن الإنسان بطبعه ضعيف، بيجري لأول حد يلاقيه قدامه، يحكي له، يشتكي، يدور على كلمة تريحه، لكن في النهاية؟ بنكتشف إن مفيش حد فاهمنا بجد، وإن الهم لسه في قلبنا، ويمكن كمان زاد أكتر.
طب ليه؟ ليه لما بنحكي مش بنرتاح؟ لأننا ببساطة بندور على الراحة عند البشر، ونسيب اللي خلق البشر! بنشتكي لناس، وننسى نرفع إيدينا للي ماسك أمرنا كله ! بنروح للي مش هيقدر يعمل لنا حاجة، ونسيب اللي قادر يغير حياتنا في لحظة !
ربنا سبحانه وتعالى قالها بوضوح: ﴿وَإِن يَمْسَسْكَ اللَّهُ بِضُرٍّ فَلَا كَاشِفَ لَهُ إِلَّا هُوَ ۖ وَإِن يُرِدْكَ بِخَيْرٍ فَلَا رَادَّ لِفَضْلِهِ﴾ (يونس: 107). الآية دي لو استوعبناها بجد، حياتنا هتتغير تمامًا لأن ببساطة، مفيش حد يقدر ينفعك أو يضرك غير ربنا، مفيش حد يقدر يفرج همك غيره، مفيش حد يقدر يحقق لك اللي بتتمناه إلا هو.
النبي ﷺ قال: "واعلم أن الأمة لو اجتمعت على أن ينفعوك بشيء لم ينفعوك إلا بشيء قد كتبه الله لك، ولو اجتمعوا على أن يضروك بشيء لم يضروك إلا بشيء قد كتبه الله عليك، رُفعت الأقلام وجفت الصحف." الحديث ده لو استوعبناه بجد، مش هنحتاج نشتكي لأي حد، لأننا هنفهم إن كل اللي بيحصل لنا مكتوب، وإن مفيش قوة في الدنيا تقدر تمنع عنك الخير اللي ربنا كاتبه لك، ومفيش حد يقدر يأذيك إلا بإذن الله.
طيب ليه الناس بتشتكي لغير ربنا؟ لأنهم فاكرين إن البشر عندهم الحلول، وإن لو حكوا لحد هيلاقي لهم مخرج. لكن الحقيقة إن الشكوى لغير الله مش بس ملهاش لازمة، دي كمان ممكن تكون سبب في تعب أكبر! ممكن تحكي لشخص مش حاسس بيك أصلاً، أو حد يتفه من مشاعرك، أو حد يستغل ضعفك ويأذيك، أو حتى حد يفضح سرك في يوم من الأيام.
لكن لما تشتكي لربنا ؟ الفرق ضخم جدًا ! لأنك بتحكي للي عارف وجعك قبل ما تتكلم، عارف دموعك قبل ما تنزل ، وعارف الحل حتى لو أنت مش شايفه. سيدنا يعقوب عليه السلام فهم الدرس ده من بدري، وعشان كده لما الدنيا ضاقت عليه، وقالوا له أولاده: "تفتكر لسه هتفضل فاكر يوسف بعد السنين دي كلها؟" كان رده بكل يقين: ﴿إِنَّمَا أَشْكُو بَثِّي وَحُزْنِي إِلَى اللَّهِ﴾ (يوسف: 86). شوف اليقين! رغم كل السنين اللي فاتت، ورغم الألم اللي عاشه ، مراحش اشتكى لحد، لكن اشتكى للي يقدر يفرجها عليه. والنتيجة؟ ربنا رجع له يوسف وأكرمه أضعاف أضعاف ما كان يتخيل !
السؤال هنا: أنت بتشتكي لمين؟ هل بتروح تحكي لكل اللي حواليك، ولا بتروح للي بيده الأمر كله؟ هل لما تضيق بيك الدنيا، أول حاجة بتعملها إنك تكلم صحابك، ولا ترفع إيديك بالدعاء؟ لأن الحقيقة اللي لازم تفهمها إن لو ربنا أراد لك خير، مفيش حد هيمنعه عنك، ولو أراد يختبرك، مفيش حد هيقدر يرفع عنك البلاء غيره.
عشان كده، بدل ما تشتكي لخلق الله، اشتكي لله. جربه ا! قوم توضى وصلي ركعتين، واحكي لربنا كل اللي في قلبك، قله كل حاجة، حتى التفاصيل الصغيرة اللي بتحس إنها مش مهمة، لأن ولا شكوى هتضيع عنده، ولا دمعة هتنزل من عينك إلا وهي محسوبة، ولا دعوة هترفعها إلا وهي محفوظة عنده، هتحس براحة عمر ما حد من البشر يقدر يدهالك.
متشتكيش لحد، لأن مفيش حد يملك لك الضر أو النفع غير اللي خلقك !