#НартайАралбайұлы #NartayNews #НартайНьюс #Еңбекадамы
📌 Бүгінгі мамандық иесі - ТІГІНШІ
Әлемде 40 мыңнан аса мамандық түрі бар екен. Солардың ішінде жыл сайын жүздеген, тіпті, мыңдаған кәсіп түрі нарық деген арықтың тасқынында жұтылып, жойылып жатыр. Дегенмен, жыл сайын тап сондай көлемде жаңа мамандықтар да пайда болуда. Сағат тілі секундтан секундқа секірген сайын дүниенің дидары мен талабы тез өзгеріп жатқан заман. Бірақ, тірліктің тынысы тоқсан тарау, сексен сала болса да бәріне де ортақ қазықты қағида бар. Ол – адал еңбек. Былтыр мемлекет басшысы Қасым-Жомарт Тоқаев осы тақырыпқа аяңдап, еңбек адамына екпін түсірді. Мамандыққа адалдық танытқан азаматтар қоғамның айнасы екенін айта келе биылғы жылды жұмысшылар жылы деп жариялаған болатын. Бұл бастаманы «Amanat» партиясы да қуаттай түсті. Себебі, партияның әуелден ұстанымы ұқсас, таңдауы төркіндес еді. «Amanat» қашаннан қарапайым еңбек адамдарына қолдау білдіріп, өскелең ұрпаққа өнеге ретінде кейіпкерлерін көрсетіп келеді. Ендеше, біз де сол ортақ мүдде жолында жобамызды жалғастырамыз. Әр «Еңбек адамы» - елдің ықыласына бөленуі керек. Бүгінгі шығарылым иненің көзінен өткендей пысық адамдарға арналады.
Адам көркі шүберек. Рас, бірақ, қазір сол шүберектің кей түрі алтынан да қымбат болып барады. Тренді мен бренді астасып жатса бағасы да аспандай береді. Бірақ, бүгінгі біздің кейіпкерлеріміз ондай қымбат киімдерді тікпесе де, сұлу мен жылуы сай келетін сапалы өнімдерді шығарып жатыр. Әр тоқылған бұйымда шын ықыластың өрнегі бар. Киім –күнделікті қажеттілік, сондықтан оған деген сұраныс ешқашан кеміген емес. Тігіншілер де заманның талабына сай бейімделіп, біліктіліктерін арттырып, жаңа стилдерді игеріп, тұтынушының талғамын таразылап, үнемі жетіліп отырады. Онығ үстіне қазіргі таңда қолдан жасалған бұйымдарға, этникалық стильдегі киімдерге сұраныс артып келеді. Бұл тігіншілер үшін тағы бір мүмкіндік.
Қазір бәрі бір-біріне ұқсап, бір үйдің балаларындай киініп алады. Әлбетте, «мода», яғни, сән әлемінің толқынына ілесудің көрінісі. Дегенмен, қашаннан ерекшеленіп, қайталанбас образда жүргісі келетін адамдар да аз емес. Міне, сондай талғамы биік тұтынушылар тігіншілердің қызметіне жүгінеді. Бір қуантарлығы еліміздегі тігіншілерге тапсырыс беретін адамдардың дені сол киімде міндетті түрле ұлттық бояу, қазақы нақыш болсын деген тілегін айтады екен. Нәтижесінде, қазір ұлттық киім дәстүрдің белгісі ғана емес, сәнге айналды. Қазақтың дизайнерлері де қазір алыс-жақын шет елдерге танылып, сән әлемінде өз өрнегін салып жатыр. Бүгінгі кейіпкерлеріміз де адал және қажырлы еңбектің айқын үлгісін көрсетіп, табысқа кенеліп отыр. Олар да ұлттық өнердің өрісін кеңейтіп, қазақ брендін жаһан жұртының жағасына тігер деп сенеміз.
"Еңбек адамы" елеусіз қалмасын! Биыл біз тұтас фильмдер сериясын жасауға бел будық. Кейіпкерлеріміз қарапайым қызметкерлер, бірақ үлкен жүректі, еңбекқор, өмірге құштар адал адамдар. Бұған дейін экрандардан тек өнерпаздар мен шенеуніктерді көретін едік. Бұл дұрыс болмады, олқылықтың орнын толтыру керек. Біз соны мойнымызға алдық. Бұйыртса 40 фильм жарыққа шығады. Көріңіздер!
Инстаграм: https://instagram.com/nartay_aralbayuli?igshid=vrytdav3x4e3
Фейсбук: https://www.facebook.com/nartai.sarsengaliyev